काठमाडौ, जेठ ६ । प्रभु इन्स्योरेन्स लिमिटेडको २५ औँ वार्षिक साधारण सभा आज बिहिबार सम्पन्न भएको छ । तीनकुने काठमाडौं स्थित कम्पनीको कार्यालय “प्रभु कम्प्लेक्स” मा बिद्युतीय माध्यमबाट भर्चुअल रुपमा सम्पन्न भएको वार्षिक साधारण सभाले आर्थिक वर्ष २०७६/०७७ को आर्थिक प्रतिवेदन पारित गर्नुका साथै कम्पनीले प्रस्ताव गरेको १० प्रतिशत बोनश शेयर तथा बोनश शेयरमा लाग्ने कर बापत शुन्य दशमलव ५३ प्रतिशत नगद लाभांश गरि जम्मा १० दशमलव ५३ प्रतिशत लाभांश साधारण सभाबाट स्वीकृत भएको छ ।

बीमा क्षेत्रमा रहेको तीव्र प्रतिस्पर्धाका बाबजुद कम्पनीले बीमा क्षेत्रमा एक सफल तथा फरक पहिचानलाई निरन्तरता दिन सक्षम रहेको तथा व्यवसाय वृद्धि, दावी भुक्तानी तथा खर्चको सफल व्यवस्थापन गर्दै आम्दानी वृद्धि गरेका कारण शेयरधनीहरुलाई प्रतिफल दिन सक्षम भएको बताउँदै विश्वभर महामारीको रुपमा फैलिएको कोरोना भाईरस (कोभिड १९) का कारण मुलुकभर आर्थिक क्रियाकलापहरु प्रभावित हुन गएको बताउनु भयो ।

कम्पनीले आधुनिक बीमा सेवाका सबै प्रविधिहरु प्रयोग गरी प्रविधिमा आधारित विमा सेवा प्रदान गर्दै आइरहेको छ । नयाँ प्रविधिहरुको अधिकतम प्रयोग गर्दै सेवाग्राहीहरुलाई सहज रुपमा सेवा प्रदान गरी शेयरधनीहरुलाई उच्चतम प्रतिफल प्रदान गर्नुका साथै सेवाग्राहीहरुलाई उत्कृष्ट सेवा प्रदान गर्ने नीति लिएको छ ।

बोनश शेयर बितरण पश्चात कम्पनीको चुक्ता पूँजी एक अर्ब १६ करोड १९ लाख दुुई हजार पुगेको छ । साथै कम्पनीले केन्द्रिय कार्यालय सहित ५५ भन्दा बढी शाखा तथा उपशाखाहरुबाट सेवा प्रदान गरिरहेको छ ।