नयाँ दिल्ली, जेठ १८। चर्चित गायक केकेको मंगलबार ५३ वर्षको उमेरमा निधन भएको छ । मंगलबार कोलकाताको एक कलेजको कार्यक्रममा गीत गाउँदै गर्दा उनको हृदयघातका कारण निधन भएको हो । केकेको पूरा नाम कृष्णकुमार कुननाथ थियो तर उनी गायक केकेको रूपमा बढी चर्चित थिए।
केकेले आफ्नो गायन करियरमा तीन हजारभन्दा बढी जिङल गाइसकेका छन् । गायक केकेले फिल्म माचिस (छोड आये हम वो गल्लियाँ) बाट बलिउडमा डेब्यू गरेका थिए। तर केकेले बलिउडमा वास्तविक पहिचान फिल्म हम दिल दे चुके सनमको 'तडप तडप के इस दिल से' भन्ने गीतबाट पाए । सोही वर्ष उनको एउटा एल्बम पनि रिलिज भएको थियो । यस एल्बमको एउटा गीत ‘याद आएगा वो पल’ युवाहरुमाझ निकै लोकप्रिय भएको थियो । आज पनि स्कुल कलेजको विदाई समारोहमा गाइने यो लोकप्रिय गीत हो ।
२३ अगस्ट १९६८ मा राष्ट्रिय राजधानी दिल्लीमा जन्मेका केकेले हिन्दी बाहेक तमिल, तेलुगु, कन्नड, मलयालम, मराठी, बंगाली र गुजराती फिल्ममा गीत गाएका थिए। उनले गाएका लगभग हरेक गीत लोकप्रिय भएका छन् ।
