काठमाडौं, जेठ २९। हलिउडका चर्चित पप गायक जस्टिन बिबरको अनुहार पक्षघात भएको छ। २८ वर्षीय पप गायक जस्टिन बिबरले हालै एउटा भिडियोमार्फत आफ्नो अनुहारको आधा भागमा पक्षाघात भएको खुलासा गरेका छन् । उनले उक्त रोगको कारणले आफ्नो आगामी म्युजिक कार्यक्रम रद्द गर्नुपरेको बताएका छन् । 'रामसे हन्ट सिन्ड्रोम' ले गर्दा अनुहारको आधा भागमा पक्षघात भएको उनले बताएका छन्। रामसे हन्ट सिन्ड्रोम भनेको एक प्रकारको डर्मेटाइटिस (छालाको रोग) को प्रकोप भएको र यसले कान नजिकैको अनुहारको स्नायुलाई असर गर्ने विज्ञहरू बताउँछन्।
'तपाईंले देख्न सक्नुहुन्छ यो आँखा झिम्किरहेको छैन। म मेरो अनुहारको यो छेउमा हाँस्न सक्दिन', उनले भनेका छन्। जस्टिन बिबरले आफूलाई निको हुन कति समय लाग्ने थाहा नभएको तर आराम र औषधिले पूर्ण निको हुनेमा आफू सकारात्मक रहेको बताएका छन् । उनले भने, 'म यो समयलाई आराम गर्न मात्र प्रयोग गर्नेछु, ताकि म त्यो गर्न सकूँ, जुन गर्नको लागि म जन्मिएको हुँ।' जस्टिनका फ्यानहरुले उनको शिघ्र स्वास्थ्य लाभको कामना गरिरहेका छन् ।
