काठमाडौं, असार १५। आज असार १५ दही चिउरा खाने दिन अर्थात धान दिवसको दिनमा यस धर्तीमा पाइला राख्नुभएका अति नै मिलनसार, हाँसो र ठट्टामा रम्न चाहने र सबैलाई हँसाउने तथा यो उमेरमा पनि १६/१७ वर्षकै जस्तो जोश र जाँगर भएका वरिष्ठ कलाकार किरण केसी 'रातामकै' को जन्मदिन विभिन्न कलाकार तथा पत्रकारहरूलाई सम्मानित गरी मनाइएको छ ।

कार्यक्रममा वरिष्ठ कलाकार मदनकृष्ण श्रेष्ठ लगायत विभिन्न कलाकारहरूको उपस्थिति रह्यो । कार्यक्रमको सुरुवात राष्ट्रिय गानबाट गरियो भने त्यसपश्चात् केसी कै नातिनी एल्भिना केसीको अडियो मार्फत मन छुने शुभकामना सन्देश सुनाइएको थियो ।

कार्यक्रममा केसीले स्वागत मन्तव्य व्यक्त गर्दै आफ्नै मिठो गीत सुनाउनु भएको थियो भने वरिष्ठ कलाकार मदनकृष्ण श्रेष्ठले पनि आफ्ना मन्तव्य प्रस्तुत गर्दै 'अरबौं मान्छेहरूमा तिमी एक मन मिल्ने मान्छे' बोलको भावुक गीत सुनाउनुभएको थियो । साथै यमन श्रेष्ठले गीत मार्फत नै जन्मदिनको शुभकामना दिनुभयो ।

कार्यक्रममा टिकटक स्टारहरु स्मरिका/समरिका ढकाल तथा टिकटककै भाइरल बालकलाकार जेभिन र जेनिश श्रेष्ठले नृत्य प्रस्तुत गर्नुभयो। यसका साथै कार्यक्रममा किरण केसीद्धारा कलाकारहरु मनोज आचार्य, पत्रकार श्याम स्मृत, हास्यव्यङ्ग्य कलाकार सुमन कार्की, लोक दोहोरी स्रष्टा गायक प्रेमराजा महत, समाजसेवी सुन्दर बहादुर केसी र माइली भाउजू कृष्ण कुमारी केसीलाई सम्मानित गरियो । कार्यक्रमको समापन दही चिउरा खाएर गरिएको थियो ।