भक्तपुर, साउन १५। माध्यामिक शिक्षा परीक्षा एसईईको ग्रेडबृद्धि (पूरक) परीक्षा भदौ ११ र १२ गते हुने भएको छ । परीक्षा नियन्त्रण कार्यालयले आइतबार ग्रेडबृद्धि परीक्षाको समय तालिका प्रकाशित गरेको छ।

बोर्डका अनुसार पूरक परीक्षाका लागि यही भदौ पाँच गतेसम्म आवेदन दिनुपर्नेछ । अन्तिम ग्रेड 'सी' वा 'सी' भन्दा कम प्राप्त गरेका विषयहरु मध्ये परीक्षार्थीहरुले आफूले चाहेको बढीमा दुई विषयसम्म परीक्षा दिन पाउने छन् । र दुई विषयसम्म अनुपस्थित रहेका परीक्षार्थीहरुले पनि ग्रेडबृद्धि (पुरक) परीक्षामा सहभागी हुन पाउने छन् ।

परीक्षाफल रद्द भएका विद्यार्थी भने ग्रेडवृद्धि परीक्षामा सहभागी हुन नपाइने बोर्डले जनाएको छ । परीक्षा आवेदन फाराम भर्नको लागि राष्ट्रिय परीक्षा बोर्ड परीक्षा नियन्त्रण कार्यालय कक्षा १० को वेबसाइट www.see.gov.np वा राष्ट्रिय परीक्षा बोर्डको वेबसाइट www.neb.gov.np बाट डाउनलोड  गर्न सकिनेछ ।  उक्त वेबसाइहरुबाट पुरक परीक्षा सञ्चालन सम्बन्धि विस्तृत जानकारी तथा विषयहरुको कोड नं सहितको विवरण समेत हेर्न सकिने बोर्डले जनाएको छ  ।