काठमाडौं, भदौ ९।  नेपाल र केन्याबीचको क्रिकेट सिरिज आजदेखि सुरू हुँदैछ। नेपाली टिमका ११ सदस्य २ दिनअघि केन्या पुगेका थिए। भिसाका समस्याका कारण बाँकी ५ खेलाडी पनि आजको खेलअघि मात्र नैरोबी पुग्दैछन्। 

नेपाल र केन्याबीचको खेल नेपाल समयअनुसार अपरान्ह ३:४५ बजे सुरू हुनेछ। खेल नेपालका लागि टी-२० वरीयता सुधार गर्न र नयाँ प्रशिक्षक मनोज प्रभाकरलाई नेपाली खेलाडी चिन्न महत्वपूर्ण हुने विश्वास गरिएको छ। 

नेपाल र केन्याबीच टी-२० मा ९ वर्षपछि भिडन्त हुन लागेको हो। यसअघि नेपाल र केन्या सन २०१३ को टी-२० विश्वकप छनोटमा प्रतिस्पर्धा गरेका थिए। शरद भेषवाकरले उत्कृष्ट फिनिसिङ गर्ने क्रममा अन्तिम ओभरमा ३ छक्का सहित २० रन प्रहार गरेपछि खेलमा नेपाल ६ विकेटले विजयी भएको थियो। 

एकदिवसीयमा भने नेपाल र केन्या ३ वर्षअघि भिडेका थिए। प्रशिक्षक प्रभाकरले जिम्मेवारी सम्हालेसँगै नेपालले केन्यामा ५ टी-२० र ३ एकदिवसीय खेल खेल्न लागेको हो।

नेपालले पहिलो आज पहिलो टी-२० खेल्दा दोस्रो खेल भदौ १० गते खेल्नेछ भने तेस्रो खेल भदौ १२ गते खेल्नेछ। 
चौथो खेल भदौ १३ र अन्तिम खेल भदौ १४ गते खेल्नेछ। 

यस्तै ३ एकदिवसीय खेलमा नेपालले पहिलो खेल भदौ १७ गते खेल्नेछ भने दोस्रो खेल भदौ १८ गते तथा तेस्रो तथा सिरिजको अन्तिम खेल भदौ २० गते खेल्नेछ।

नेपाली टोलीमा कप्तान लामिछानेसँगै उपकप्तान पौडेल, आसिफ शेख, आरिफ शेख, दीपेन्द्रसिंह ऐरी, देव खनाल, आदिल अन्सारी, करण केसी, ज्ञानेन्द्र मल्ल, सोमपाल कामी, बसिर अहमद, अर्जुन साउद, पवन सरार्फ, साहब आलम, किशोर महतो र विवेक यादव छन्।