काठमाडौं, भदौ १४ । नेपाली राष्ट्रिय फुटबल टोलीका गोलकिपर किरण चेम्जोङ (किरण कुमार चेम्जोङ लिम्बू) ले डेढ वर्षदेखिको प्रेमलाई विवाहमा परिणत गर्दैछन् । प्रेमिका कञ्चन निरौलासँग भोलि बुधबार काठमाडौंमा किरणले विवाह गर्न लागेका हुन् । यसअघि सोमबार उनीहरूले मेहन्दी कार्यक्रम गरेका थिए । कञ्चन निरौला पेशाले एयरहोस्टेज हुन् ।
गत असार २१ गते माल्दिभ्सको शीर्ष डिभिजन लिग धिवेही प्रिमियर लिगको उत्कृष्ट गोलकिपरमा किरण घोषित भएका थिए । त्यस दिन किरणले मैदानमै प्रेमिका कञ्चन निरौलालाई औँठी लगाइदिएर बिहेको प्रस्ताव गरेका थिए । मैदानमा उनको टिमले खुसियाली मनाइरहेको बेला किरणले प्रेमिकाको हात समातेर मैदानमा लगेका थिए ।
नेपाली राष्ट्रिय फुटबल टोलीका गोलरक्षक किरण नेपाली फुटबल इतिहासका उत्कृष्ट फुटबल खेलाडीहरू मध्येका एक हुन्। सन् २०१७ देखि उनी व्यवसायिक फुटबल खेलका लागि माल्दिभ्सको क्लब टिसी स्पोर्ट्स क्लबमा अनुबन्धित भएका थिए भने सन् २०१९ देखि उनी भारतको आइलिगमा खेल्ने पञ्जाबको एक व्यवसायीक फुटबल क्लब मिनार्व पञ्जाबमा अनुबन्धित भएका छन्
किरणले नेपालको नेपाल राष्ट्रिय लिग सहित अन्य दुई विदेशी राष्ट्रका प्रतिष्ठित लिग उपाधि समेत जिती सकेका छन्।
