बागमती, भदौ १७ ।  नेपाल विद्युत् प्राधिकरण बागमती प्रदेश डिभिजन कार्यालय हेटौँडाले विद्युत् महसुल नतिर्ने ६,४७७ ग्राहक विद्युत् लाइन काटिदिएको छ । लामो समय देखि पटक पटक ताकेता गर्दा समेत महशुल नतिर्ने ती ग्राहकको आर्थिक वर्ष  २०७८-७९ मा प्राधिकरणले विद्युत् बन्द गरिदिएको हो ।  

कार्यालय प्रमुख दीपेन्द्रराज द्विवेदीका अनुसार विद्युत् लाइन काटेर कारवाही गरेपछि तिनीहरुबाट रु. १७ करोड ५१ लाख २८ हजार जरिवाना सहित विद्युत् महसुल उठेको छ । ती मध्ये सोही  अवधिमा ५,७७६ ग्राहकको लाइन जोडिएको बताइएको छ । लाइन काटिएकाबाट कूल उठ्नुपर्ने रकम १९ करोड, ९५ लाख ७७ हजार २ सय ८ रहेको थियो ।
 
उक्त कारवाही सो प्रदेश कार्यालयअन्तर्गतको हेटौँडा वितरण केन्द्र, टाडी वितरण केन्द्र, भरतपुर वितरण केन्द्र, चनौली वितरण केन्द्र, सिन्धुली वितरण केन्द्र तथा पालुङ वितरण केन्द्रले  विद्युत् सेवा लिएर महसुल नबुझाए पछि कारवाही गरेएको सो कार्यालयबाट प्राप्त विवरणमा उल्लेख गरिएको छ ।
 
ती कार्यालयबाट विद्युत् चोरी गर्ने गत आर्थिक वर्ष ०७८-७९ मा १ सय ९४ ग्राहकलाई कारवाही गरी रु. २१ लाख ४२ हजार ४ सय ५४ जरिवाना सङ्कलन गरेको भएको थियो ।

त्यस्तै विभिन्न कारणले हुने विद्युत् चुहावट पनि अघिल्लो वर्षको तुलनामा कम भएको सो प्रदेश कार्यालयले जनाएको छ । अघिल्लो आर्थिक वर्ष २०७७-७८ को तुलनामा गत आर्थिक वर्षमा विद्युत् चुहावट घटेको हो । विद्युत् चुहावट अघिल्लो वर्षमा ७.७२ प्रतिशत थियो भने गत आर्थिक वर्षमा घटेर ७.३७ प्रतिशतमा झरेको हो ।    
  
ती कार्यालयमा विगतका तुलनामा विद्युत् ग्राहक सङ्ख्या बढेर यस वर्ष ३ लाख ३ हजार ८ सय ४५ भएको बताइएको छ । सो अवधिमा ७३ करोड २९ लाख २१ हजार युनिट विद्युत् महसुल बिक्री भएको र त्यसबापत रु. ५ अर्ब ७६ करोड ६० लाख १७ हजार विद्युत् महसुल सङ्कलन भएको सो प्रदेश कार्यालयका लेखा प्रमुख सञ्जयकुमार श्रेष्ठले जानकारी दिनुभयो । अर्थात् ९४.३७ प्रतिशत विद्युत् महसुल सङ्कलन भएको हो ।

सो कार्यालयअन्तर्गतको विद्युत् चुहावट घट्दै गएको प्रदेश डिभिजन कार्यालयको तथ्याङ्कमा उल्लेख गरिएको छ । प्राप्त विवरण अनुसार हेटौँडा वितरण केन्द्रको अघिल्लो आर्थिक वर्षमा ५.११ प्रतिशत चुहावट थियो भने गत आर्थिक वर्षमा ३.१५ प्रतिशतमा झरेको, पालुङ वितरण केन्द्रको अघिल्लो आर्थिक वर्षमा २६.५५ प्रतिशत विद्युत् चुहावट थियो भने गत आर्थिक वर्षमा २५.९२ प्रतिशतमा झरेको, टाँडी वितरण केन्द्रको  अघिल्लो आर्थिक वर्षमा १२.२७ प्रतिशतबाट गत आर्थिक वर्षमा १२.१८  प्रतिशतमा चुहावट झरेको बताइएको छ । 

त्यस्तै भरतपुर डिभिजन केन्द्रको अघिल्लो आर्थिक वर्षमा विद्युत् चुहावट  ५.४८ प्रतिशत थियो भने गत आर्थिक वर्षमा ५.४५ प्रतिशतमा झरेको, चनौली वितरण केन्द्रको  अघिल्लो आर्थिक वर्षमा १४.५१ प्रतिशत चुहावट थियो भने गत आवमा २०.९१ पतिशतमा झरेको तथा सिन्धुली विद्युत् वितरण केन्द्रको अघिल्लो आर्थिक वर्षमा विद्युत् चुहावट १६.५२ प्रतिशत थियो भने गत आवमा ११.९८ प्रतिशतमा विद्युत् चुहावट  झरेको प्राप्त विवरणमा बताइएको छ ।