कोलोम्बो, भदौ १८।  श्रीलंकाका पूर्वराष्ट्रपति गोटाबाया राजापाक्षे स्वदेश फर्किनुभएको छ । खराब आर्थिक संकटका कारण भएको प्रदर्शन चर्किएपछि देश छोडेका उहाँ स्वदेश फर्किनुभएको हो ।

राजधानी कोलम्बोको राष्ट्रपति भवन र अन्य सरकारी कार्यालय प्रदर्शनकारीले कब्जा गरेपछि ७३ वर्षीय राजापाक्षे देश छोडेर भाग्नुपरेको थियो ।  राजापाक्षे स्वदेश फर्किएको कोलम्बो विमानस्थलका अधिकारीले पुष्टि गरेका छ । राजापाक्षे विमानस्थलमा उत्रदा मन्त्रीहरू र राजनीतिज्ञको समूहले स्वागत गरेका छन् ।

श्रीलंका एअरफोर्सको विमानबाट माल्दिभ्स पुगेका उहाँ त्यहाँबाट सिंगापुर पुग्नुभएको थियो । सिंगापुरमै रहेका बेला राजापाक्षेले जुलाइ १३ मा राजीनामा पठाउनुभएको थियो । श्रीलंकामा पछिल्ला वर्ष विदेशी मुद्रामा आएको गिरावटका कारण खाद्यान्न र इन्धनको चरम अभाव छ । खाद्यान्न र इन्धनको मूल्यमा भएको वृद्धिपछि गएको अप्रिलमा आन्दोलन सुरु भएको थियो ।