काठमाडौं, भदौ ३१ । दशरथ रंगशालामा जारी महिला साफ च्याम्पियनसिपको सेमिफाईनल खेलमा आज नेपालले भारतसँग प्रतिस्पर्धा गर्दैछ ।

त्रिपुरेश्वरस्थित दशरथ रंगशालामा हुने यो खेल साँझ ५ः३० बजेबाट शुरु हुनेछ । नेपाल समूह ए को विजेता बन्दै सेमिफाइनलमा प्रवेश गरेको हो । साफ च्याम्पियनसिपको इतिहासमा दोस्रो पटक नेपालले सेमिफाइनलमा भारतको सामना गर्दैछ । आज नेपाल अर्को इतिहास रच्ने सुरमा हुनेछ । भुटानले भने साफको १२ वर्षे इतिहासमा पहिलो जित निकाल्दै सेमिफाइनलको यात्रा तय गरेको छ । फाईनल खेल असोज ३ गते हुनेछ ।

दोस्रो खेलको अघिल्लो दिन नेपाली टोलीकी स्टार फरवार्ड सावित्रा भण्डारी र विंगर मन्जली कुमारी योन्जनलाई डेंगी संक्रमण देखिएपछि विश्रामममा बसेका उनीहरुको सेमिफाइनलमा खेल्ने(नखेल्ने टुंगो लागिसकेको छैन । अहिले उनिहरुको स्वास्थ्य अवस्था सामान्य रहेको बताईएको छ ।