काठमाडौं, असोज ५। आफ्ना छोराछोरीले धेरै पढेर लेखेर जीवनमा अगाडि बढून् भन्ने चाहना हरेक अभिभावकको हुन्छ । यसका लागि उनीहरु आफ्नो बालबालिकालाई पढाउने प्रयास गरिरहन्छन् । तीमध्ये केही अभिभावकका छोराछोरी पढाइमा अगाडि बढ्छन् भने धेरैका छोराछोरी औसत रहेर कुनै न कुनै हिसाबले कक्षा पास मात्रै गर्न सक्छन् ।

वास्तवमा, हरेक बालबालिकामा फरकफरक बौद्धिक क्षमता हुन्छ । केही बच्चाहरूले छिटो सिक्छन् भने कसैले तिनीहरूलाई सिक्न समय लाउँछन् । यो सबै उनीहरूको बौद्धिक स्तरको कारणले हुन्छ। उच्च बौद्धिकता भए पनि पढाइमा मन नलागेको अवस्था चिन्ताको विषय हो । यसका धेरै कारण हुन सक्छन्, जसमा बच्चाको अध्ययन कक्षको वास्तु दोष पनि समावेश हुन्छ। जसका कारण बच्चाको मन पढाइमा एकाग्रताको कमी हुन्छ । यस्तो विषयमा वास्तु दोष हटाउन यस्ता उपायहरू अपनाउन सकिन्छ -

वास्तुशास्त्र अनुसार अध्ययनका लागि पूर्व र उत्तर दिशा उत्तम मानिन्छ । त्यसैले बच्चाको लागि बनाइएको अध्ययन रुम वा अध्ययन टेबललाई पूर्व वा उत्तरतिर फर्काएर राख्नु पर्दछ । बच्चाको कोठाको अध्ययन टेबलमाथि देवी सरस्वतीको चित्र पूर्व दिशामा राख्नु उपयुक्त हुन्छ। माता सरस्वतीलाई ज्ञानकी देवी मानिन्छ । उनीहरूको अगाडि बस्दा पढ्ने प्रेरणा मिल्छ। योसँगै अध्ययनको टेबलमा विश्व ग्लोब राख्न सकिन्छ।

बच्चाको स्टडी टेबलको अगाडि ऐना कहिल्यै राख्नुहुँदैन । ऐना राख्दा बच्चाहरू पढ्नको सट्टा आफ्नो सजावटमा व्यस्त हुनसक्छन्, जसले पढाइबाट ध्यान हटाउँछ। वास्तुशास्त्रका अनुसार बच्चाको अध्ययन टेबलमा पुस्तकहरू चाङ बनाएर राख्न पनि हुँदैन । यसो गर्दा किताबको भीड देखेर डर लाग्न सक्छ र पढाइबाट मन मोडिन सक्छ ।

यस्तै बच्चा अध्ययन गर्ने कोठामा जुत्ता र चप्पल कहिल्यै राख्नु हुँदैन। त्यहाँ जुत्ता र चप्पल राख्दा कोठामा नकारात्मक ऊर्जाको प्रवाह बढ्छ, जसका कारण बच्चाको दिमाग पढाइबाट हट्न थाल्छ । त्यसैले जहिले पनि जुत्ता र चप्पल निकालेर मात्र अध्ययन कोठामा प्रवेश गर्नुपर्दछ ।