काठमाडौं, असोज ११ ।  बंगलादेशविरुद्धको मैत्रीपूर्ण खेलमा नेपालका अञ्जन विष्टले ह्याट्रिक गरेका छन् । नेपालले घरेलु मैदानमा बंगलादेशलाई ३–१ ले पराजित गरेको छ।

त्रिपुरेश्वरस्थित दशरथ रंगशालामा मंगलबार भएको खेलमा नेपालले पहिलो हाफमा ३–० को अग्रता लिदा दोस्रो हाफमा एक गोल खाएको थियो । खेलको १८औं मिनेटमा पहिलो गोल गर्दै खाता खोलेका अञ्जनले २७औं मिनेटमा दोस्रो गोल गर्न सफल भए । उनले बिमल घर्ती मगरको फ्रीकिकमा हेडमार्फत् पहिलो गोल गरेका हुन् ।

३८औं मिनेटमा अन्जन विष्टले ह्याट्रिक पूरा गरेपछि नेपाल खेलमा ३–० ले अघि बढ्यो । विशाल राईको फ्रिकिकलाई अन्जनले हेडमार्फत गोल गर्न सफल भए । योसँगै अन्जन नेपालका लागि ह्याट्रिक गर्ने छैटौँ खेलाडी बनेका छन् ।