सल्यान, असोज १२। सल्यानमा जीप दुर्घटना हुँदा आठ जनाको मृत्यु भएको छ ।  बाँकेको कोहलपुरबाट छुटेको उक्त जीप सल्यानको कपुरकोट गाउँपालिका रिमनजिकैको मूलपानी भन्ने स्थानमा दुर्घटनामा परेको प्रहरीले जनाएको छ ।

दुर्घटनामा सख्त घाइते भएका एक जनालाई उद्धार पछि उपचारका लागि दाङ तुलसीपुर लैजाने तयारी गरिएको छ । जीप बुधबार बिहान करिब १ बजे तिर नै भीरबाट १५० मिटर तल खसेको तर समयमै प्रहरीलाई जानकारी नहुँदा उद्धार कार्यमा ढिलाइ भएको स्थानीयले बताएका छन्  ।  बाँकेको ढकेरीबाट बिहेबाट घर फर्कँदै गरेका व्यक्तिहरु दुर्घटनामा परेको बुझिएको छ।

घटनास्थलमा प्रहरीसहित जनप्रतिनिधि, स्वास्थ्यकर्मी, स्थानीयवासिन्दा उद्धारमा खटिएका छन्। घटनाको पूर्ण विवरण आउन बाँकी छ।