काठमाडौं, कात्तिक १ । चलचित्र ‘मिलन' को ट्रेलर सार्वजनिक गरिएको छ । आउँदै गरेको तिहार सकिए लगतै कात्तिक १८ गतेबाट देशव्यापी प्रदर्शनमा आउने तयारीमा रहेको 'मिलन’ को सोमबार काठमाडौंमा एक कार्यक्रमका बिच प्रेम र बिछोडले भरिएको ट्रेलर सार्वजनिक गरिएको हो ।

टेक पौरखी राईको लेखन तथा निर्देशन रहेको यो चलचित्रको सार्वजनिक तीन मिनेट लामो ट्रेलर अभिनेता सलोन बस्नेत र कुशल शाह ठकुरीको अभिनेत्री शिल्पा थापासँगको प्रेम र बिछोडमा केन्द्रित छ । त्रिकोणात्मक प्रेम कथामा निर्माण गरिएको 'मिलन’ मा सलोन, कुशल र शिल्पासँगै सुमिन गुरुङ, शिशिर बाङ्ग्देल र बिशोल पहाडीको मुख्य भूमिका रहेको छ । यसै चलचित्रबाट अभिनेता कुशल र अभिनेत्री शिल्पाले डेब्यु गर्दैछन् ।

कार्यक्रममा अभिनेता सलोनले आफूले काम गरेका राम्रा र आफूलाई निकै मन परेको चलचित्रहरु मध्ये ‘मिलन ’ पनि पर्ने बताउनुभयो । उहाँले नेपालमा कोभिड १९ को महामारी कम हुँन थालेपछि डरका बिच नै काम थालनी गरेको भन्दै अनुभव साट्नुभयो । साथै अन्य चलचित्र जसरी नै यस चलचित्रलाई पनि सबैले माया गरिदिन आग्रह गर्नुभयो ।

नव अभिनेता कुशल शाह ठकुरीले आफूलाई विश्वास गरेर चलचित्रमा काम गर्ने अवसर प्रदान गरेकोमा निर्माता प्रविण थापालाई धन्यवाद दिनुभयो । उहाँले आफूले ठुलो पर्दाका लागी पहिलो अनुभव भएको र धेरै कुरा सिक्ने मौका पाएको बताउनुभयो । साथै नवअभिनेत्री शिल्पा थापाले पनि चलचित्र 'मिलन’बाट धेरै कुरा सिक्ने मौका पाएको बताउनुभयो । अर्का मुख्य कलाकार शिशिर बाङ्गदेलले चलचित्रको अनुभव साट्नुभयो । चलचित्रमा धेरै नयाँ कलाकार भएपनि चलचित्र निकै राम्रो बनेको उनले बताउनुभयो ।

चलचित्रका निर्देशक टेक पौरखी राईले निर्देशन गरेको यो तेस्रो चलचित्र हो । यसअघि उहाँले ‘मट्टी माला’ र ‘माया पिरिम’ निर्देशन गरिसक्नु भएको छ । निर्देशक राईले यसअघिका चलचित्र जस्तै ‘मिलन ’ लाई पनि सबैले माया गरिदिने विश्वास व्यक्त गर्नुभयो । साथै केही समय अघि केही विशेष ब्यक्तिहरूलाई चलचित्र देखाएको र राम्रो प्रतिक्रिया आएको भन्दै उत्साह बढेको बताउनुभयो । चलचित्रका निर्माता प्रविण थापाले विशेष गरी युवापुस्ताका लागी मन पर्ने चलचित्र निर्माण गरेको जानकारी दिनुभयो ।

उहाँले चलचित्र निर्माणमा आगामी दिनमा पनि निरन्तरता दिने बताउनुभएको छ ।  कार्यक्रममा अतिथिको रुपमा उपस्थित निर्देशक तथा कलाकार शोभित बस्नेतले आफूले चलचित्र हेर्ने मौका पाइसकेको र निकै राम्रो बनेको भन्दै तारिफ गर्नुभयो । साथै कलाकार जय किशन बस्नेत र राजनीतिज्ञ पुण्य गौतमले पनि चलचित्रको ट्रेलर हेरिसकेपछि खुलेरै प्रशंसा गरे । चलचित्रको ट्रेलर ‘टाकुरा फिल्मस्’को युट्युब मार्फत सार्वजनिक गरिएको छ ।

चलचित्रको निर्माण टिमले यसअघि पोस्टर र गीत सार्वजनिक गरिसकेको छ। चलचित्रमा जानुका पौडेल, रेजिना एक्चै मगर, डेनियल खड्का, करन थापा मगर लगायतका कलाकारको पनि अभिनय रहेको छ । काठमाडौं र कालिन्चोकमा छायांकन गरिएको यो चलचित्र राहुल राईको छायांकन रहेको छ भने तारा किम्बे थापाको सम्पादन रहेको छ । चलचित्रमा भिएफएक्स टंक बहादुर राईको रहेको छ ।