कात्तिक १८ । कीर्तिपुरमा चितुवाका कारण मोटरसाइकल दुर्घटना हुँदा एक जना घाइते भएका छन्।
बिहीबार राति करिब ९ बजे कामबाट कीर्तिपुर-३ समलस्थित डेरामा फर्किरहेका निशान्त चौधरी त्रिभुवन विश्वविद्यालय परिसरमा रहेको अन्तर्राष्ट्रिय क्रिकेट खेल मैदानअगाडि मोटरसाइकल दुर्घटनामा परेको हुन्।
चितुवाले बाटो काट्दै गरेको देखेपछि मोटरसाइकलले ब्रेक समात्दा लडेर चालक घाइते भएका हुन्। ‘चितुवासँगै ठोक्किनचाहिँ पाएन। एक्कासी सडकमा चितुवा आयो, मोटरसाइकलले झ्याप्प ब्रेक समात्दा लडेको देखिन्छ,’प्रहरी वृत्त कीर्तिपुरका डिएसपी पुरूषोत्तम पाण्डेले बताउनुभयो।
दुर्घटनामा घाइते निशान्तको कीर्तिपुर अस्पतालमा उपचार भइरहेको र खतरामुक्त रहेको डिएसपी पाण्डेले बताउनुभयो । उँहाका अनुसार हरेक वर्ष यही सिजनमा त्रिवि क्षेत्रका खुल्ला जंगलमा चितुवा देखा पर्ने गरेको छ।
आहाराको खोजीमा निस्कने चितुवा बागवानी, आयुर्वेद अस्पताल, क्रिकेट ग्राउण्ड, त्रिवि सेवा आयोग हुँदै विद्यार्थी क्लबको जंगलसम्म ओहोरदोहोर गरिरहने डिएसपी पाण्डेले जानकारी दिनुभयो।
