काठमाडौं, कात्तिक १८ । प्रधानमन्त्रीको सरकारी निवास बालुवाटारको गेट पत्रकार सम्मेलन गर्न खोज्दा निहारिका सिंह राजपुतलाई प्रहरीले रोकेको छ।
बलात्कार आरोपी शिवराज श्रेष्ठ र उनका छोराको डिएनए परीक्षणको रिपोर्ट सार्वजनिक गर्न माग गर्दै शुक्रबार दिउँसो पत्रकार सम्मेलनका लागि राजपुत बालुवाटार गएकी थिइन्। निषेधित क्षेत्रमा पत्रकार सम्मेलन गर्न नपाउने भन्दै प्रहरीले उनलाई रोकेको हो।
‘हामीले उहाँलाई नियन्त्रणमा लिएका छैनौं। बालुवाटारमा रोकेर उहाँका सम्बन्धित मान्छेलाई बुझाइसक्यौं,’ काठमाडौं प्रहरी परिसरका एसपी दिनेशराज मैनालीले भने।
राजपुतले आफूलाई अंश र नाता कायम नचाहिएको तर शिवराजलाई बलात्कार मुद्दामा कारबाही हुनु पर्ने बताइन्। ‘मलाई कुनै प्रकारको अंश, नाता कायम र बच्चाको सम्पत्तिको अधिकार चाहिएन। शिवराजलाई तुरून्त प्रहरीले पक्रिनुपर्यो। बलात्कारको अभियोगमा कारबाही अघि बढाउनपर्यो,’ उनले भनिन्, ‘केही मिडियाले मलाई सोधेको थिए बच्चाको डिएनए मिलेन भने के गर्नुहुन्छ। अब डिएनए मिल्यो। एउटा महिला भएर यति वर्ष म रोएँ, कराएँ, जति मेरो क्षति भएको छ राज्यले दिन्छरु मलाई न्याय चाहियो।’
महोत्तरी जलेश्वरकी राजपुतका छोराको डिएनए बलात्कार आरोपी धनुषाको धनुषा क्षीरेश्वरनाथ नगरपालिका-३ का शिवराज श्रेष्ठसँग मिलेको रिपोर्ट शुक्रबार सार्वजनिक भएको थियो। विधि विज्ञान प्रयोगशाला काठमाडौंले शुक्रबार उच्च अदालत जनकपुरलाई पठाएको डिएनए रिपोर्टमा बच्चा र शिवराजको डिएनए ९९.९९९ प्रतिशत मिलेको रिपोर्ट आएको जाहेरीवाली निहारिकाकी वकिल रिंकु यादवले जानकारी दिइन्।
उच्च अदालत जनकपुरका रजिष्टार खड्गराज अधिकारीले पनि बच्चा र शिवराजको डिएनए मिलेको पुष्टि गरे।शिवराजले नशालु पदार्थ पिलाएर बलात्कार गरेपछि गर्भ बसेको भन्दै निहारीकाले जाहेरी दिएकी थिइन्। तर शिवराजले भने ती बच्चा आफ्नो नरहेको दावी गर्दै आएका थिए।
बच्चा शिवराजकै रहेको निहारीकाको दावीपछि उच्च अदालत जनकपुरका न्यायाधीशद्वय भोजराज अधिकारी र रेखा थापा पाण्डेको संयुक्त इजलासले गएको भदौ ८ गते दुबैजनाको डिएनए परीक्षण गर्न आदेश दिएको थियो।
त्यसपछि उच्च सरकारी वकिल कार्यालय जनकपुरमार्फत् निहारिकाको रोहबरमा विधि विज्ञान प्रयोगशाला काठमाडौंमा डिएनए परीक्षण भएको थियो। जिल्ला अदालत धनुषाले पनि ०७८ माघ २४ गते जबरजस्ती करणी नभएको फैसला सुनाएको थियो।
०७६ माघ १९ गते ‘नारी अस्मिताको रक्षा गरी जीवन रक्षा गरी पाऊँ’ र सोही वर्ष फागुन ११ गते ‘हक-अधिकार दिलाई पाऊँ’ भनी जिल्ला प्रहरी कार्यालय धनुषामा निहारिकाको नामबाट निवेदन परेको थियो।
निवेदनमा निहारिका र शिवराजबीच श्रीमान-श्रीमतीको समबन्ध उल्लेख थियो। सोही आधारमा जिल्ला न्यायाधीश परशुराम भट्टराईले श्रेष्ठविरूद्ध जबरजस्ती करणीको अभियोग दाबी नपुग्ने भन्दै सफाइ दिएका थिए।
जिल्ला अदालतको फैसलाबाट चित्त नबुझेको भन्दै निहारिकाले ०७८ फागुनमा उच्च अदालत जनकपुरमा पुनरावेदन गरेकी थिइन्। तर उच्च अदालत पनि प्रतिवादीसँग मिलेर पेसी नतोकेको र डिएनए जाँच गर्न समेत नभनेको भन्दै उनी काठमाडौंमा आमरण अनसन बसेकी थिइन्।
दोस्रो पटक अनसनको क्रममा निहारिकाले राष्ट्रपति भवन अगाडि आत्मदाह गर्ने प्रयास गरेपछि फास्ट ट्रयाकमा मुद्दाको सुनुवाइ अघि बढाइएको थियो। डिएनए परीक्षणको रिपोर्ट नआएकाले निहारिकाको मुद्दामा पेशी चढ्न सकेको थिएन।
जिल्ला प्रहरी, सरकारी, वकिल हुँदै उच्च अदालतमा डिएनए परीक्षणको रिपोर्ट आएको हो। शिवराज साधारण तारिखमा छन्। उनको कात्तिक २५ गते तारेख छ। चुनावपछि यो मुद्दाको पेशी चढ्ने उच्च अदालत जनकपुरका रजिष्टार खड्गराज अधिकारीले जानकारी दिए।
