दोहा,  मंसिर १०।   कतार संस्करणमा पहिलो जितसँगै अर्जेन्टिनाले ३ अंक जोड्दै समूह चरण पार गर्ने सम्भावना बढाएको हो । अर्जेन्टिना पहिलो खेलमा साउदी अरेबियाविरुद्ध २-१ अप्रत्यासित हार बेहोरेपछि मेक्सकोविरुद्ध जित्नैपर्ने दबाबमा परेको थियो ।  

लियोनल मेसी र एन्जो फर्नान्डेजले दोस्रो हाफमा गोल गरेपछि अर्जेन्टिनाले कठिन खेलमा मेक्सिकोलाई २-० ले पराजित गर्दै शनिबार विश्वकप २०२२ को नकआउट चरण प्रवेशको सम्भावनालाई कायमै राखेको छ ।

लुसेल रंगशालामा भएको खेलमा मेसीले ६४ औं मिनेटमा गोल गर्दै अर्जेन्टिनालाई अग्रता दिलाएका थिए । एन्जोले ८७ औं मिनेटमा अग्रता दोब्बर बनाउँदै अर्जेन्टिनाको जित पक्का गरे । दुवै गोल उत्कृष्ट रह्यो ।

त्यसैगरी अन्य खेलहरुमा, साउदीमाथि २-० को जित निकालेको पोल्यान्ड ४ अंकसहित समूह "सी"को शीर्षस्थानमा रहेको छ । ३ अंक बटुलेको साउदीले समूह चरणको अन्तिम खेलमा मेक्सिको विरुद्ध प्रतिस्पर्धा गर्ने छ । पोल्यान्डसँग गोलरहित खेलेको मेक्सिकोलाई अर्जेन्टिना विरुद्धको हारले अन्तिम १६ मा स्थान बनाउन कठिन हुने भएको छ ।