काठमाडौं, मंसिर १२ । नेपालमा डिजिटल हेल्थ कन्फरेन्स आयोजना हुने भएको छ । मंसिर ११ र १२ गते हुने यो सम्मेलन नेपालमा पहिलो पटक हुन लागेको हो ।
काठमाडौँमा आयोजना हुने यो सम्मेलनमा नेपालको डिजिटल स्वास्थ्य क्षेत्रको वर्तमान अवस्था र भावी कार्यदिशा लगायतका विषयमा केन्द्रित हुने बताइएको छ। स्वास्थ्य तथा जनसंख्या मन्त्री भवानी प्रसाद खापुङको प्रमुख आतिथ्यतामा सम्पन्न हुने सो सम्मेलनमा नेपालका लागि स्विस राजदूत एलिजाबेथ भोन क्यापेलरका साथै स्विट्जरल्याण्ड, जापान, दुबई लगायतका डिजिटल हेल्थमा क्रियाशील अन्तराष्ट्रिय वक्ताहरूले कार्यपत्र प्रस्तुत गर्नेछन्। नेपालका स्वास्थ्यसम्बद्ध विज्ञहरुले समेत कार्यपत्र प्रस्तुत गर्ने आयोजकले बताएको छ ।
सम्मेलनमा नेपालका डिजिटल हेल्थसम्बद्ध सरकारी तथा गैरसरकारी सङ्घसंस्थाका प्रतिनिधि र अन्य सरोकारवालाहरुको उल्लेख्य उपस्थिति रहनेछ । डिजिटल हेल्थको सन्दर्भमा नेपालको वर्तमान स्वास्थ्य नीतिले सम्बोधन गरेको विषय पनि सम्मेलनको विशेष मुद्दा हुनेछ । यसका साथै डिजिटल हेल्थमा नेपालका दूरदराजका जनताको सहज पहुँचको वातावरण सिर्जना गर्ने विषय पनि सम्मेलनको मुख्य छलफलको विषय बन्ने बताइएको छ ।
