काठमाडौं, मंसिर २३ । कतारमा जारी विश्वकप फुटबलमा आजदेखि क्वाटरफाइनलका खेलहरु सुरु हुँदैछन्। आज शुक्रबार क्वाटरफाइनलका दुई खेलहरु हुनेछन् ।

पहिलो क्वाटरफाइनल ब्राजिल र क्रोएसियाबीच हुनेछ । खेल एजुकेशन सिटी रंगशालामा नेपाली समयअनुसार राति ८ः४५ बजे सुरु हुनेछ ।

सन् २००२ को च्याम्पियन बनेको ब्राजिल २०१४ मा बाहेक क्वाटरफाइनलभन्दा अघि बढ्न सकेको छैन । ब्राजिल दक्षिण कोरियालाई र साविक उपविजेता क्रोएसियाले जापानलाई हराउँदै क्वाटरफाइनल प्रवेश गरेको थियो।

यस्तै दोस्रो क्वाटरफाइनलमा अर्जेन्टिना र नेदरल्यान्ड्सबीच प्रतिस्पर्धा हुनेछ । खेल लुसाइल स्टेडियममा राति १२ः४५ बजे सुरु हुनेछ । अर्जेन्टिनाले अष्ट्रेलियालाई र नेदरल्यान्ड्सले अमेरिकालाई हराउँदै क्वाटरफाइनल प्रवेश गरेको थियो। २०१० को उपविजेता नेदरल्यान्ड्स पछिल्लो १९ खेलमा अपराजित छ ।