काठमाडौं, पुस १३ । आयोजना कार्यान्वयन निर्देशनालय (पिआईडी) बाट मेलम्चीको खानेपानी वितरणका लागि काठमाडौं उपत्यकाभित्र बिच्छ्याइएका खानेपानीका नयाँ पाइलाइनबाट मेलम्चीको खानेपानी वितरण गर्दा चुहावट नभएको देखिएको छ । काठमाडौंका अनामनगर, थापाथली लगायतका क्षेत्रमा नियमितरूपमा र परीक्षण सम्पन्न भएका अन्य स्थानमा तालिकामा समावेश नगरी खानेपानी वितरण गर्दा चुहावटको समस्या नदेखिएको हो ।
खानेपानी चुहावट भएको भनी यस निर्देशनालयमा उपभोक्ताहरूबाट विभिन्न मितिमा आएका जानकारीका आधारमा मर्मतका लागि प्राविधिक टोली पठाउँदा नयाँ पाइपलाइनबाट नभई आधिकांश पुराना पाइपलाइनबाट खानेपानी चुहावट भएको पाइएको छ । काठमाडौं उपत्यकाका विभिन्न स्थानमा तेस्रो पक्ष लगायतबाट सडक तथा ढल निर्माण/मर्मत, विद्युतलाइन र टेलिफोनका तार भूमिगत गर्ने लगायतका कार्य हुँदा क्षति पुगेका खानेपानी वितरण प्रणालीका ठूला पाइपलाइन र खानेपानी वितरण सञ्जालका पाइपलाइनमध्ये अधिकाङ्शको मर्मत कार्य सम्पन्न भइसकेको छ । तर तेस्रो पक्ष लगायतबाट विभिन्न कारणले खानेपानीका पाइपलाइनमा क्षति हुन नछाडेकाले खानेपानीका पाइपलाइनमा क्षति पुग्नेगरी कुनै काम नगर्न/नगराउन सम्बन्धित सबै निकायहरूको ध्यानाकर्षण गराउँदछौँ, निर्देशनालयले भनेको छ ।
निर्देशनालयबाट काठमाडौं उपत्यकाका विभिन्न स्थानमा पहिलो चरणमा बिच्छ्याइएका १ हजार १० किलोमिटर खानेपानीका नयाँ पाइपलाइनमध्ये करिव ५५० किलोमिटर पाइपलाइनको परीक्षण गर्ने कार्य सम्पन्न भएको छ । हाल काठमाडौंका सिनामङ्गल, कोटेश्वर, नरेफाँट, पुरानो बानेश्वर, बत्तीसपुतली, रातोपुल, ज्ञानेश्वर, हाँडीगाऊँ लगायतका क्षेत्र र ललितपुरका ग्वार्को, मङ्गलबजार, बालकुमारी, सुन्धारा, बगलामुखी, कृष्णमन्दिर, कुपण्डोल, पुल्चोक, मानभवन, लगनखेल लगायत अन्य क्षेत्रमा खानेपानीका नयाँ पाइपलाइनको परीक्षण गर्ने कार्यलाई तीव्रता दिइएको छ ।
तेस्रो पक्ष लगायतबाट विगतमा विभिन्न कारणले खानेपानीका नयाँ पाइपलाइनमा क्षति भएको तर जानकारी नपाएका स्थानहरूमा नयाँ पाइपलाइनको परीक्षण गर्दा खानेपानी चुहावट भई सडकमा बग्नसक्ने भएकाले त्यस्तो देखिएमा यस आयोजना कार्यान्वयन निर्देशनालयलाई जानकारी दिन सबैसँग हार्दिक अनुरोध गरेको छ । खानेपानी चुहावटका बारेमा निर्देशनालयका टोल फ्री नं. ११३९, फोन नं. ०१-५७०५७७१, ०१-५७०५९१६ वा फ्याक्स नं. ०१-५७०५०५७ वा इमेलबाट जानकारी दिन सकिने व्यवस्था जानकारी पनि निर्देशनालयले दिएको छ ।
