काठमाडौं, पुस २२ । पहिलो संस्करणको नेपाल टी-२० लिगमा जनकपुर रोयल्सले लुम्बिनी अल स्टारलाई २३ रनले पराजित गर्दै क्वालिफायरमा स्थान बनाएको छ ।

किर्तिपुरस्थित टियु मैदानमा भएको खेलमा जनकपुरले लुम्बिनीलाई जितको लागि १ सय ६० रनको लक्ष्य दिएको थियो । लुम्बिनीले भने १७ ओभरमा ७ विकेट गुमाएर १ सय ३६ रन मात्र बनायो ।

हारका बाबजुत पनि दश खेल खेलेर ८ जित तथा २ हार हात पारेको लुम्बिनी पहिले नै क्वालिफायरमा पुगिसकेको छ । १० खेलमा १६ अंक सहित लुम्बिनी अंक तालिकाको शीर्ष स्थानमा रहेको छ।

यस्तै दश खेलमा सात जित र तीन हार हात पारेको जनकपुर आजको खेल जिते पश्चात अंक तालिकाको दोस्रो स्थानमा रहेको छ । आजको खेल जितेसँगै जनकपुर पनि पहिलो क्वालिफायरमा पुगेको छ ।

लुम्बिनी र जनकपुरले आईतबार हुने पहिलो क्वालिफायर खेल्ने छन् । यस लिगमा काठमाडौं नाइट,पोखरा एभेन्जर्स,फार वेस्ट युनाईटेड,जनकपुर रोयल्स,विराटनगर सुपर किंग्स र लुम्बिनी अल स्टार रहेका छन् ।