काठमाडौं, माघ  ५ ।  काठमाडौंको गोकर्णेश्वर नगरपालिका-५ शिवचोकमा यूपी ७८ एफसी १८४८ नम्बरको ट्रक र बा.८६ प ९७६५ नम्बरको  मोटरसाइकल एकआपसमा ठक्कर खाई बुधबार बिहान दुर्घटना हुँदा मोटरसाइकल चालक रामेछाप उमाकुण्ड गाउँपालिका-७  घर भएका २६ वर्षीय स्माइल सुनुवारको मृत्यु भएको छ । दुर्घटनामा गम्भीर घाइते भएका उनको शिक्षण अस्पताल महाराजगंजमा उपचारको क्रममा मृत्यु भएको हो । दुर्घटनामा घाइते भएका मोटरसाइकलमा सवार १ जनाको सोही अस्पतालमा उपचार भइरहेको छ । हाल फरार ट्रक चालकको प्रहरीले खोजी गरिरहेको छ । 

बाराको कलैया उपमहानगरपालिका-१४ लक्ष्मीनियास्थित सडकमा म.प्र.-०३-०२५ प ३९५८ नम्बरको मोटरसाइकल अनियन्त्रित भई गएराति दुर्घटना हुँदा मोटरसाइकल चालक कलैया उपमहानगरपालिका-१४ जितपुर बस्ने ३५ वर्षीय अरुन चौधरीको मृत्यु भएको छ । बागलुङको बागलुङ नगरपालिका-८ सिगानास्थित सडकमा बा.२ क ९२५८ नम्बरको टिपर सडकबाट करिब २ सय मिटर तल खसेर बुधबार बिहान दुर्घटना हुँदा चालक मकवानपुर हेटौंडा उपमहानगरपालिका-१४ बस्ने ४३ वर्षीय राजु मोक्तानको घटनास्थलमै मृत्यु भएको छ । 

रुपन्देहीको सैनामैना नगरपालिका-२ झारवैरा चोकमा लु.१ ख ८७८५ नम्बरको बसले लु.३ च ४३८४ नम्बरको  पिकअप गाडीलाई  बुधबार बिहान ठक्कर दिँदा पिकअपमा सवार शुद्धोधन गाउँपालिका-१ बेलवा बस्ने ३५ वर्षीय गोरक लोनियाको मृत्यु भएको छ । दुर्घटनामा गम्भीर घाइते भएका उनको लुम्बिनी प्रादेशिक अस्पताल बुटवलमा उपचारको क्रममा मृत्यु भएको हो । दुर्घटनामा घाइते भएका पिकअपमा सवार अन्य ८ जना र बसमा सवार १ जनाको सोही अस्पतालमा उपचार भइरेहको छ । बस चालकलाई प्रहरीले नियन्त्रणमा लिएको छ । दुर्घटनाका सम्बन्धमा प्रहरीले थप अनुसन्धान गरिरहेको छ ।