धनुषा, माघ १९ । धनुषाको इलाका प्रहरी कार्यालय महेन्द्रनगरबाट प्रहरी हिरासतको पर्खाल फोडेर भागेका छ थुनुवामध्ये थप एकजना पक्राउ परेका छन्।

फरार लागुऔषध मुद्दाका थुनुवा क्षीरेश्वरनाथ नगरपालिका-५ का ३५ वर्षीय विनोदकुमार शर्मालाई बुधबार राति मिथिला नगरपालिका-१० लालगढको रातो खोलाको बगर छेउबाट पक्राउ गरिएको हो ।

यसअघि मिथिला-२ का २५ वर्षीय हरिदीप सिंह, क्षीरेश्वरनाथ-२ का २५ वर्षीय अमित मण्डल र मिथिला-६ का रोशनकुमार महतो पक्राउ परेका थिए। सिंहलाई मंगलबार राति र मण्डललाई मंगलबार दिउँसो पक्राउ गरिएको  प्रहरी उपरीक्षक प्रदीपबहादुर क्षेत्रीले जानकारी दिए।

त्यस्तै, हातहतियार खरखजाना मुद्दाका रोशनलाई सोमबार साँझ नै प्रहरीले पक्रेको थियो । गत आइतबार राति इलाका प्रहरी कार्यालयको हिरासतको भित्ता फोडेर विभिन्न मुद्दाका छ थुनुवा फरार भएका थिए । उनीहरुमध्ये चार जना पक्राउ परेका छन् भने बाँकी दुईको खोजी कार्य भईरहेको जिल्ला प्रहरी कार्यालयले जनाएको छ।