काठमाडौं, माघ २३ ।  नेकपा माओवादी केन्द्रकी उर्मिला अर्याल राष्ट्रियसभा उपाध्यक्षमा निर्विरोध चयन हुनुभएको छ। अर्यालको एकल उम्मेदवारी परेकाले उनी निर्विरोध चयन हुनुभएको हो ।

प्रमुख प्रतिपक्षी नेपाली कांग्रेसले उम्मेदवारी नदिने निर्णय गरेपछि अर्यालको एक्लो उम्मेदवारी परेको थियो। राष्ट्रिय सभामा नेकपा माओवादी केन्द्रका संसदीय दलका नेता नारायणकाजी श्रेष्ठ प्रस्तावक हुनुहुन्थ्यो भने समर्थकमा नेकपा एमालेका सांसद देवेन्द्र दाहाल र सांसद खिमलाल देवकोटा हुनुहुन्थ्यो। तत्कालीन उपाध्यक्ष शशिकला दाहालको कार्यकाल सकिएपछि विगत १ वर्षदेखि उपाध्यक्षको पद खाली रहँदै आएको थियो।

राष्ट्रियसभामा एमालेका १६, माओवादी केन्द्रको १५ सांसद छन्। यस्तै, नेपाली कांग्रेसका १०, नेकपा (एकीकृत समाजवादी) का ८, जनता समाजवादी पार्टीका ३, लोकतान्त्रिक समाजवादी पार्टी र राष्ट्रिय जनमोर्चाका १-१ सांसद छन्। १ जना स्वतन्त्र र ३ जना मनोनीत सांसद छन्। रिक्त रहेका १ सदस्यका लागि यही माघ २५ गते निर्वाचन हुन लागेको छ।

अर्याल १ वर्षअघि भएको निर्वाचनमा माओवादीको तर्फबाट राष्ट्रिय सभा सदस्य बन्नुभएको हो। २०७० सालमा माओवादी प्रवेश गर्नुभएकी अर्याल त्योभन्दा पहिला एमालेमा सक्रिय हुनुहुन्थ्यो। उहाँ २०६३ मा एमालेको तर्फबाट महिला बालबालिका तथा समाज कल्याण मन्त्री बनेकी बन्नुभएको थियो। अर्याल २०७० र २०७४ मा नेकपा माओवादी केन्द्रको तर्फबाट पर्सामा उमेदवार बन्नुभएको थियो। उहाँ अहिले नेकपा माओवादी केन्द्रकी स्थायी कमिटी सदस्य हुनुहुन्छ।