ढल्केवर, माघ २५ । धनुषा प्रहरीले हातहतियार तथा गोली सहित एक मिटरब्याजीलाई पक्राउ गरेको छ।
पक्राउ पर्नेमा जनकपुरधाम उपमहानगरपालिका-१ बस्ने ४१ वर्षीय दिलिप साह रहेका छन्।
जिल्ला प्रशासन कार्यालय धनुषामा विभिन्न व्यक्तिहरूले दिएको उजुरीका आधारमा शनिबार जिल्ला प्रहरी कार्यालय धनुषाका प्रहरी नायव उपरीक्षक दिपककुमार रायको कमाण्डमा खटिएको प्रहरी टोलीले मिटरब्याजी साहको घर तथा पसलको खानतलासी गर्दा हातहतियार तथा गोली सहित उनलाई पक्राउ गरिएको प्रहरीले जनाएको छ।
प्रहरीका अनुसार उनको घरबाट कपाली तमसुकहरू, जग्गाधनी पुर्जाहरू, खाली चेक लगायतका अन्य कागजातहरू तथा कटुवा पेस्तोल १ थान, ३०३ राइफलमा लाग्ने गोली ४ थान, म्यागनममा लाग्ने गोली १ थान र म्यागनमको खोका १ थान बरामद भएको हो।
पक्राउ परेका साह माथि थप अनुसन्धान भइरहेको जिल्ला प्रहरी कार्यालय धनुषाले जनाएको छ।
