काठमाडौं, फागुन १० । नेपाली क्रिकेट टोलीका पूर्व कप्तान एवं स्पिनर सन्दीप लामिछानेले आइसिसी विश्वकप लिग-२ त्रिकोणात्मक ओडिआई सिरिजमा जित हासिल गरेपछि देशले क्रिकेट जितेको भन्दै सम्पूर्णमा आभार व्यक्त गरेका छन् ।

उनले मैले मैले कति योगदान गर्न सके थाहा छैन तर मेरो देशले क्रिकेट जितेको छ भन्दै यो साथ र मायाको लागि सम्पूर्णमा हृदयदेखी आभारी छु भनेर धन्यवाद व्यक्त गरेका छन् । यसै सिरिजबाट राष्ट्रिय टोलीमा फर्किएका सन्दीपको उत्कृष्ट प्रदर्शन रहेको थियो । उनले सिरिजको चार खेलमा ४० ओभर बलिङ गरेर एक सय ८४ रन दिएर १३ विकेट हात पारेका थिए ।

लिग टू च्याम्पियन बनिसकेको स्कटल्याण्ड र नामिबिया रहेको सिरिजमा नेपालले पहिलो पटक ४ खेलमा सबै चार खेल जित्न सफल भएको थियो । मैदानमा नेपाललाई समर्थन गर्न दर्शकहरु उर्लिएका थिए । साथै हिजो मंगलबार टियू क्रिकेट मैदानमा सन्दीपलाई यूएइमा हुने खेलमा समावेश गर्न माग गर्दै नाराबाजी समेत भएको थियो। उनलाई अदालतले विदेश जान रोक लगाएको छ ।