ग्रीस, फागुन १७ ।  ग्रीसमा भएको रेल दुर्घटनामा परी कम्तीमा २९ जनाको मृत्यु भएको छ भने दर्जनौं घाइते भएका छन् ।

मंगलबार साँझ दुईवटा रेल एक आपसमा ठोक्किँदा यो दुर्घटना भएको हो । आपतकालीन सेवाहरूले उत्तरी ग्रीसमा यो दुर्घटनाको जानकारी दिएको छ। उद्धारकर्ताहरू घटनास्थलमा छन् र यात्रुहरूलाई बचाउने प्रयास गरिरहेका छन्।

दुर्घटनास्थलमा पनि आगलागी भएको खबर छ । यात्रुवाहक रेल र मालवाहक रेल एक आपसमा ठोक्किँदा दुर्घटना भएको हो । आगो निभाउन १७ वटा गाडी घटनास्थलमा पठाइएको दमकलले जनाएको छ । दुर्घटनाको कारण भने अहिलेसम्म थाहा हुन सकेको छैन ।

समाचार एजेन्सी रोयटर्सबाट उद्धार गरिएका एक व्यक्तिले भने - मानिसहरु आतंकित थिए र कराउन थालेका थिए । अर्का यात्रुले भने - भूकम्प गएजस्तो लाग्यो ।