ग्रीस, फागुन १८ । ग्रीसमा भएको रेल दुर्घटनामा हालसम्म ४३ जनाको मृत्यु भएको छ । दुर्घटनापछि कतिपय ठाउँमा विरोध प्रदर्शन पनि भएका छन् ।
ग्रीसका प्रधानमन्त्री किरियाकोस मित्सोटाकिसले यो दुर्घटना मानवीय त्रुटिको परिणाम भएको बताएका छन् । प्रधानमन्त्री बुधबार घटनास्थल पुगेका थिए ।
दुर्घटनामा एउटा मालगाडी र यात्रुवाहक रेल एक आपसमा ठोक्किएका थिए । दुर्घटनापछि ग्रीसका यातायात मन्त्रीले राजीनामा दिएका छन् । स्थानीय स्टेसन मास्टर विरुद्ध पनि मुद्दा दर्ता भएको छ । उद्धार टोलीले घाइतेको खोजी गरिरहेको छ भने केहीको अस्पतालमा उपचार भइरहेको छ ।
यद्यपि, यो अझै स्पष्ट भएको छैन कि कसरी दुईवटा रेल एकै समयमा ट्र्याकमा आमने सामने आए। सिग्नल दिन जिम्मेवार स्टेशन मास्टरले कुनै गल्ती नभएको र प्राविधिक कारणले दुर्घटना भएको बताए ।
प्रधानमन्त्री किरियाकोस मित्सोटाकिसले भने, “कानूनले आफ्नो बाटो लिन्छ, दोषीलाई पक्राउ गरिनेछ। सरकार आम जनताको साथमा छ ।”
