काठमाडौं, फागुन २८ । प्रधानमन्त्री पुष्पकमल दाहाल ‘प्रचण्ड’ ले अर्थतन्त्रलाई चलायमान बनाउने तर्फ वर्तमान सरकारको ध्यान केन्द्रित भएको बताउनु भएको छ । प्रधानमन्त्री प्रचण्डले अर्थतन्त्र सजिलो अवस्थमा नरहेपनि आत्तिनुपर्ने अवस्था भने नरहेको प्रष्ट पार्नुभयो । नेपाल निर्माण व्यवसायी महासंघको २४ औं साधारण सभाको राजधानीमा उद्घाटन गर्दै प्रधानमन्त्री प्रचण्डले सुशासन, सामाजिक न्याय र समृद्धिलाई सरकारले उच्च महत्व दिएको बताउनुभयो ।

भौतिक पूर्वाधारको विकास विस्तार गर्ने निर्माण व्यवसायीहरू नै समृद्धिको वाहक भएको बताउँदै प्रधानमन्त्री प्रचण्डले व्यवसायीहरूका जायज मागलाई सम्बोधन गरिने प्रतिबद्धता जनाउनुभयो । व्यवसायीहरूको अरबौं भुक्तानी रोकिएको बताउँदै प्रधानमन्त्री प्रचण्डले यो समस्या समाधानका लागि पहल भइरहेको सङ्केत गर्नुभयो । ‘निर्माण उद्योगसँग सम्बन्धित ऐन नियम संशोधन गर्दा अब अनिवार्य रुपमा निर्माण व्यवसायीहरूसँग परामर्श गरिनेछ ’ प्रचण्डले भन्नुभयो । उहाँले निर्माण व्यवसायीहरूलाई पनि आफ्ना गल्ती कमजोरी महसुस गर्दै अघि बढ्न ध्यानाकर्षण गराउनुभयो ।

उपप्रधानमन्त्री एवं भौतिक पूर्वाधार तथा यातायात मन्त्री नारायणकाजी श्रेष्ठले व्यवसायीहरूसँग ‘मिलोमतो’ होइन मिलेर अघि बढिने स्पष्ट पार्नुभयो । निर्माण उद्योगका समस्याबारे आफू जानकार रहेको बताउँदै उहाँले समस्या समाधानका लागि नीतिगत रुपमा नै पहल भइरहेको बताउनुभयो । पूँजीगत खर्च बढाउँदै व्यापार घाटा कम गर्नु अहिलेको मुख्य आवश्यकता भएको उहाँको भनाइ थियो । सांसद गंगा कार्कीले अर्थतन्त्र कमजोर हुँदा निर्माण उद्योग मारमा परेको बताउनुभयो । पूर्व सांसद एवं महासंघका मानार्थ सदस्य जिप छिरिङ लामा शेर्पाले राजनीतिक अस्थिरताको मार निर्माण उद्योगले भोगेको बताउनभुयो । महासंघका अध्यक्ष रवि सिंहले निर्माण व्यवसायीहरूको मागका विषयमा सरकारको ध्यानाकर्षण गराउँदै जायज माग पूरा नभएको आन्दोलनमा जानुको विकल्प नभएको बताउनुभयो । व्यवसायीहरूको अरबौं भुक्तानी रोकिएको, ऐन कानून अनुसार पाउनु पर्ने मोबिलाइजेसन पेश्की व्यवसायीहरूले नपाएको, काम गर्ने वातावरण नभएको लगायतका विषयमा अध्यक्ष सिंहले प्रधानमन्त्री प्रचण्डको ध्यानाकर्षण गराउनु भएको थियो ।

महासंघका पूर्व अध्ययक्षहरू सुकुन्तलाल हिराचन, जयराम लामिछाने लगायतले व्यवसायीहरू सफल भएमा मात्र राज्य सफल हुने भन्दै चाहेर पनि निर्माण व्यवसायीहरूले काम गर्ने अवस्था नरहेको बताउनुभयो । कार्यक्रममा चेम्बर अफ कमर्सका अध्यक्ष रोजेन्द्र मल्ल, नेपाल उद्योग परिसंघका अध्यक्ष विष्णु अग्रवाल लगायतले राजश्व संकलनमा कमी आउँदा अर्थतन्त्र धराशायी भएकोतर्फ सरकारको ध्यानाकर्षण गराउनुभयो । सोही अवसरमा प्रधानमन्त्री प्रचण्डले महासंघको मुखपत्र ‘निर्माण विशेषाङ्क’ को विमोचन गर्दै अग्रज निर्माण व्यवसायीहरू हरिप्रसाद पाण्डे, देवकृष्ण मानन्धर, प्रताप तामाङ र आइपी प्रधानलाई सम्मान गर्नु भएको थियो ।

सोही अवसरमा, महासंघका महासंघका वरिष्ठ उपाध्यक्ष आङ दोर्जी लामा (ए.डी), महासचिव रोशन दाहाल, कर्णाली प्रदेश निर्माण व्यवसायी महासंघका अध्यक्ष मोहनप्रकाश आचार्य र निर्माण व्यवसायी संघ सिन्धुपाल्चोकका अध्यक्ष छत्र तामाङले निर्माण व्यवसायीहरूका समस्या बारे चर्चा गर्नु भएको थियो ।