काठमाडौं, फागुन २८ ।  नयाँ सिजनको सहिद स्मारक (ए) डिभिजन लिग फुटबलमा न्युरोड टिम एनआरटी र त्रिभुवन आर्मी क्लबले रोमान्चक बराबरी खेलेका छन् ।

च्यासल मैदानमा आइतबार भएको खेलमा एनआरटी र आर्मीले ३-३ गोलको बराबरी खेलेका हुन् । रोमान्चक खेलमा शुरुआती अग्रता भने आर्मीले बनाएको थियो ।

खेलको १५ औं मिनेटमा नवयुगले पेनाल्टीबाट गोल गर्दै आर्मीलाई सुरुआती अग्रता दिलाएका थिए । तर, खेलको ५२ औं मिनेटमा लालनुनजामाले गोल गर्दै एनआरटीलाई १-१ गोलको बराबरीमा ल्याए ।

५७ औं मिनेटमा जिन एन्सर एमबोउमिले पेनाल्टीबाट गोल गर्दा एनआरटी २-१ ले अघि रह्यो । खेलको ६२औं मिनेटमा लालनुनजामाले व्यक्तिगत दोस्रो गोल गर्दा एनआरटी ३-१ ले अघि रह्यो ।

खेलको ६८ औं मिनेटमा सुदिल राईले गोल गर्दै आर्मीलाई ३-२ को स्थितिमा ल्याए । त्यसपछि खेलको ८६ औं मिनेटमा दिनेश हेन्जनले फ्रिकिक मार्फत गोल गर्दै आर्मीलाई ३-३ गोलको बराबरीमा ल्याए ।

एनआरटीले अघिल्लो २ खेलमा हार व्यहोरेको थियो । यस बराबरीसँगै एनआरटीले ३ खेलमा १ अंक जोडेको छ । आर्मीको यो दोस्रो बराबरी हो । आर्मीले ३ खेलमा ५ अंक जोडेको छ ।