काठमाडौं, फागुन २९ । आइसीसी विश्वकप लिग २ अन्तर्गत आजको खेलमा नेपालले पपुआ न्यू गिनीलाई ९ विकेटले पराजित गरेको छ । पपुआ न्यू गिनीले दिएको ९६ रनको लक्ष्य नेपालले ७.४ ओभरमै हासिल गरेको थियो । सजिलै लक्ष्य हासिल गर्न नेपालका ओपनरहरुले तुफानी ब्याटिङ गरे ।

ओपनर आसिफ शेखले २१ बलमा ८ चौका र ३ छक्का सहित ५३ रन बनाएर नटआउट रहे । अर्का ओपनर कुशल भुर्तेल १४ बलमा ४ चौका र २ छक्का हान्दै ३३ रन बनाएर आउट भए । कुशल मल्ल १२ रनमा नटआउट रहे । पिएनजीका लागि १ विकेट चाड सोपरले लिए ।

टस हारेर ब्याटिङको निम्तो पाएको पिएनजीलाई नेपालले ३२ ओभरमा ९५ रनको स्कोरमा अलआउट गरेको थियोे । नेपालका लागि सन्दीप लामिछानेले ५ विकेट लिए । १० ओभर बलिङ गरेका उनले १ मेडन सहित २५ रन खर्चिए । ललित राजवंशीले २, कुशल मल्लले २ र सोमपाल कामीले १ विकेट लिए ।

पिएनजीका लागि कप्तान असद भालाले सर्वाधिक २० रन बनाए । सेसे बाउले १८, चार्ल्स अमिनीले १६, हिरी हिरीले १४ रन बनाए । अरु कुनै पनि ब्याटरले दोहोरो अंकमा रन बनाउन सकेनन् ।