कोहिस्तान, वैशाख ४ । पाकिस्तानको कोहिस्तान जिल्लामा ईश्वरनिन्दा गरेको आरोपमा एक चिनियाँ नागरिकलाई पक्राउ गरिएको छ । दासु जलविद्युत आयोजनामा कार्यरत यी व्यक्तिविरुद्ध स्थानीय प्रहरी चौकीमा किटानी जाहेरी परेको छ । उक्त व्यक्तिलाई पक्राउ गर्नुको कारण विद्युत आयोजना स्थलमा आक्रोशित जनताको भीड पुग्नु थियो ।
हालसम्म प्राप्त जानकारी अनुसार यो मामिला चिनियाँ नागरिक र डम्पर चालकबीचको चर्को विवादसँग सम्बन्धित छ । यो विवादको कारण रमजानको समयमा कामको सुस्त गति र नमाजको लागि छुट्टी लिनु थियो।
चिनियाँ व्यक्तिले चालकहरूलाई नमाज पढिरहेको ठाउँमा पछ्याए र अल्लाह र इस्लामका पैगम्बर विरुद्ध निन्दापूर्ण टिप्पणी गरे। उनको भनाइले स्थानीय जनतामा आक्रोश फैलाएपछि मगरिबको नमाजको समयमा हजारौंको भीड जम्मा भएपछि स्थिति तनावपूर्ण बनेको थियो ।
प्रदर्शनकारीले स्थानीय प्रहरी चौकीमा ढुंगामुढा गरेका थिए । अभियुक्तलाई नियन्त्रणमा लिएपछि तनाव नियन्त्रणमा आएको थियो । दासुको कमिला प्रहरी चौकीका एक अधिकारीले यो अप्रिल १५ को घटना हो र मानिसहरूले मन्डारिन नजान्ने भएकाले यसबारे कुनै छलफल नभएको तर अप्रिल १६ बाट उनको भनाइ निन्दापूर्ण भएको समाचार फैलिन थालेको बताए।
यस मामिलामा आतंकवाद विरोधी धारा र २९५ सी अन्तर्गत मुद्दा दर्ता गरिएको छ। पैगम्बर विरुद्ध निन्दा पाकिस्तान दण्ड संहिताको धारा २९५ सी अन्तर्गत मृत्यु वा आजीवन कारावासको सजाय हुने अपराध हो।
एसएचओ नसिरुद्दीनले अभियुक्तलाई आज अदालतमा पेश गरिने र इलाकाको अवस्था शान्तिपूर्ण रहेको बताए । यस विषयमा चीनले अहिलेसम्म कुनै प्रतिक्रिया दिएको छैन ।
