काठमाडौं, वैशाख १९ ।  राजधानीमा जारी शहिद स्मारक 'ए' डिभिजन लिग फुटबलमा थ्रीस्टार क्लब खुमलटार युथ क्लबसंग बराबरीमा रोकिएको छ ।

मंगलबार ललितपुरको च्यासल मैदानमा भएको खेलमा थ्रीस्टारले खुमलटारसंग २-२ गोलको बराबरी खेलेको हो । खेलको चौथो मिनेटमा लाकेन लिम्बुको गोलबाट थ्री स्टारले १-० को अग्रता लिएको थियो । पहिलो हाफको इन्ज्युरी समयमा खुमलटारका मेसुके ओलोमोउले गोल गर्दै खेललाई १-१ गोलको बराबरीमा ल्याए ।

दोश्रो हाफको ५०औं मिनेटमा स्टेफन समिरले गोल गर्दै खुमलटारले २-१ को अग्रता बनायो भने ६८ औं मिनेटमा थ्रीस्टारका आदित्य शाक्यले पेनाल्टीमा गोल गर्दै खेललाई २-२ गोलको बराबरीमा ल्याए । बराबरीसँगै थ्री स्टार २३ अंकका साथ तालिकाको दोश्रो स्थानमा छ भने खुमलटार १४ अंकका साथ १३ औं स्थानमा छ ।

त्यस्तै मंगलबार नै एन्फा कम्प्लेक्स सातदोवाटोमा भएको खेलमा जावलाखेललाई नेपाल पुलिस क्लबले २-१ गोल अन्तरले पराजित गर्यो । पुलिसको जितमा मोसेस ग्याबाह र अहमद हिजाजीले १-१  गोल गरे । जावलाखेलका विपिन कँडेलले १ गोल फर्काए । जितसँगै पुलिसले १४ खेलमा १५ अंक जोडेको छ । जावलाखेल १४ खेलमा २४ अंक जोडेर शीर्ष स्थानमा रहेको छ ।