काठमाडौं, जेठ ४ । नेपाल चेम्बर अफ कमर्सको आयोजनामा छैटौँ चेम्बर एक्स्पो बिहीबार शुरु भएको छ । काठमाडौंको भृकुटीमण्डपमा शुरु मेलामा स्वदेशी उत्पादनसँगै विभिन्न अन्तराष्ट्रिय वस्तुहरू प्रर्दशनी तथा बिक्रीका लागि राखिएका छन्।

मेलामा नेपालमै उत्पादित घरेलु तथा हस्तकलाका सामाग्रीहरू लगायत जडीबुटी, आयुर्वेदिक जन्य वस्तुहरू पनि प्रदर्शनीमा राखिएका छन् । यस्तै अटोमोबाईल, विद्युतीय सामाग्री, फेसन वेयर, छाला जन्य वस्तुहरु समेत प्रर्दशनी एवं बिक्रीका लागि राखिएको छ । छैटौं चेम्बर एक्स्पोकोश्रम रोजगार तथा सामाजिक सुरक्षा मन्त्री शरदसिंह भण्डारी भण्डारीले उद्घाटन गर्नुभयो ।

एक्स्पोको उद्घाटन गर्दै उहाँले निजी क्षेत्रमैत्री वातावरण सिर्जना गर्न सरकार प्रतिवद्ध रहेको बताउनुभयो । उद्योग, व्यवसाय मैत्री नीति मार्फत निजी क्षेत्रसँग सहकार्य गर्न सरकार तयार रहेको मन्त्री भण्डारीको भनाई छ । उहाँले मुलुकभित्रै रोजगारी सिर्जना गरेर युवाहरूलाई विदेशिनबाट रोक्न सरकारले गृहकार्य गरिरहेको समेत बताउनुभयो ।

मेलाको उद्घाटन सत्रलाई सम्बोधन गर्दै चेम्बरका अध्यक्ष राजेन्द्र मल्लले कठिन आर्थिक अवस्थामा पनि व्यवसायिक गतिविधिलाई बढाउन व्यापारमेला आयोजना गरिएको बताउनुभयो । छैटौँ व्यापार मेलामा चेम्बरले अन्तरक्रिया, आयात निर्यातको सूचना आदान प्रदान एवं नेपाली वस्तुहरूको बजारीकरणमा जोड दिइने जनाएको छ । सम्बोधनका क्रममा अध्यक्ष मल्लले विदेशबाट आउने वस्तुहरूको भन्सारमा सहजीकरण एवं कार्यक्रम सकिएपछि बस्तु फिर्ता लैजान पाउने व्यवस्थाका लागि सरकारसमक्ष अनुरोध गर्नुभयो ।

उहाँले भन्नुभयो, ‘अन्तराष्ट्रिय स्तरको एक्स्पो स्थल स्थापना गर्न सकिए यसले मुलुकको निर्यात व्यापारलाई थप टेवा पुग्छ भन्ने सरकार समक्ष आग्रह गर्दछु । 'मुलुकभित्र आयोजना हुने अन्तर्राष्ट्रियस्तरका व्यापार मेला तथा प्रदर्शनीहरुले उत्पादन, उपभोक्ताको चाहना एवं बजारीकरण तथा व्यापारिक गतिविधिहरूको प्रत्यक्ष  अवलोकन गर्न सकिने अध्यक्ष मल्लको भनाई छ । उहाँले भन्नुभयो,‘चेम्बर एक्स्पोले वाह्य व्यापारिक समुदायसँग सहकार्य भई स्वदेशी उद्यमी व्यवसायीहरुमा प्रतिस्पर्धात्मक क्षमता अभिवृद्धि गर्न समेत ज्यादै प्रभावकारी हुनेछ, ।’

चेम्बर एक्स्पोलाई सम्बोधन गर्दै वाणिज्य सचिव मधु मरासिनीले अर्थतन्त्रलाई चलायमान बनाउन व्यापार मेला फलदायी हुने बताउनुभयो । उहाँले भन्नुभयो, माग र आपूर्ति एवं रोजगारी सिर्जना गरेर अर्थतन्त्र चलायमान बनाउन व्यापार मेलाले महत्वपूर्ण सहयोग गर्छ भन्ने मेरो विश्वास छ । यस्ता खाले व्यापार मेला केन्द्रदेखि स्थानीय तहसम्मै गर्नका लागि सरकारले नीतिगत व्यवस्था पनि गरिरहेको छ, ।’

उत्पादन र उपभोक्तालाई एकैठाउँमा जोड्न पनि मेला निकै फलदायी भएको वाणिज्य सचिव मरासिनीको भनाई छ । मुलुकमा नौ खर्ब रुपैयाँ भन्दा बढीको निर्यात क्षमता भएपनि यसको पहिचान हुन नसकेको उहाँले बताउनुभयो । मेला आज बिहिबारदेखि आगामी ८ गते सम्म सञ्चालन हुनेछ । मेलामा स्वदेशी उद्योगी व्यवसायीसँग भारत, बंगलादेश पाकिस्तान लगायतका मुलुकका उद्योगी व्यवसायीले सहभागिता जनाएका छन् ।