काठमाडौं, जेठ ८ । इन्डियन वुमन्स लिग फुटबल प्रतियोगिताको उपाधि गोकुलम केरलाले जितेको छ । आईतबार राती भएको खेलमा किक स्टार्ट क्लबलाई ५-० गोलको फराकिलो अन्तरले हराउँदै गोकुलम च्याम्पियन बन्यो ।
गोकुलमको जितमा नेपालकी सावित्रा भण्डारीले एक गोल गरिन् । योसँगै नेपाली राष्ट्रिय महिला फुटबल टिमकी फरवार्ड सावित्रा भण्डारी हिरो इन्डियन वुमन्स लिगको सर्वाधिक गोलकर्ता बनेकी छन् ।
लिग अवधिभर सावित्राले ५ ह्याट्रिकसहित ३० गोल गरिन् । यो भारतीय वुमन्स लिगको एकै सिजनमा कुनैपनि खेलाडीले गरेको सर्वाधिक गोल हो ।
नेपाली राष्ट्रिय महिला फुटबल टिमकी स्ट्राइकर समेत रहेकी सावित्रा भण्डारीले लिगमा सर्वाधिक गोलकर्ताको अवार्ड प्राप्त गरिन् । सावित्राले भारु एक लाख प्राप्त गरिन् । यो सहित गोकुलम तेस्रो पटक इज्डियन वुमन्स लिगको च्याम्पियन भएको छ ।
