क्वालालम्पुर, जेठ १८ ।  महिला टि-२० क्रिकेट शृङ्खलाको तेस्रो खेलमा नेपालले मलेसियालाई २७ रनले हराएको छ । जितसँगै नेपालले ५ खेलको शृङ्खलामा २-१ को अग्रता बनाएको छ ।

बांगीमा आज भएको तेस्रो खेलमा जितका लागि १ सय ११ रनको लक्ष्य पछ्याएको मलेसियाले निर्धारित २० ओभरमा ४ विकेट गुमाएर ८३ रन मात्रै बनायो । उसका महिराह इजाती इस्माली सर्वाधिक ४४ रनमा अविजित रहेपनि टोलीको हार टार्न सकिनन् ।

नेपालका कविता कुँवर, सीता राना मगर र इन्दु बर्माले समान १/१ विकेट लिए । त्यसअघि टस हारेर पहिला ब्याटिङ गरेको नेपालले निर्धारित २० ओभरमा ५ विकेट गुमाएर १ सय १० रन बनाएको थियो ।

नेपालका लागि कप्तान रुवीना क्षेत्रीले सर्वाधिक २७ रन जोडिन । त्यस्तै ज्वोती पाण्डेले २३, सीता राना मगरले २१ र इन्दु बर्माले २० रन बनाए ।

मलेसियाकी निक नुर डीनले २ विकेट लिइन । त्यस्तै एलिसा फिर्दुज र विनफ्रिद आनीले समान १/१ विकेट लिए । पहिलो खेलमा ५ विकेटले पराजित भएको नेपालले दोस्रो खेलमा मलेसियालाई ७ विकेटले हराएको थियो ।

श्रृंखला अन्तर्गत पर्सी शनिवार चौथो र आइतवार पाँचौँ तथा अन्तिम खेल हुनेछ ।