काठमाडौं, जेठ १८ ।  हिजो भाउ बढेर नयाँ रेकर्ड कायम गरेको सुनको मूल्य आज फेरि बढेर अहिलेसम्मकै महँगो भएको छ । आज तोलामा ५ सय रुपैयाँले बढेर सुन तोलाको १ लाख १२ हजार ५ सय रुपैयाँमा पुगेको हो ।

यो भाउ अहिलेसम्मकै उच्च हो । हिजो सुनको भाउ तोलामा १ लाख १२ हजार रुपैयाँ पुगेको थियो । आज फेरि तोलामा ५ सय रुपैयाँले बढेको नेपाल सुन चाँदी व्यवसायी महासंघले जनाएको छ ।

सुनको भाउ अझै बढ्ने सम्भावना रहेको महासंघले जनाएको छ । यस अघि गएको वैशाख २१ गते सुनको भाउ तोलामा १ लाख ११ हजार ८ सय रुपैयाँमा पुगेको थियो ।

यस्तै, चाँदीको पनि आज भाउ बढेको छ । आज चाँदी तोलामा १ हजार ४ सय १० रुपैयाँमा कारोबार भइरहेको छ । चाँदी हिजो तोलाको १ हजार ३ सय ९५ रुपैयाँ थियो ।