काठमाडौं, जेठ २१ । शहीद स्मारक 'ए' डिभिजन लिग फुटबलमा नेपाल पुलिस क्लबले मच्छिन्द्र फुटबल क्लबलाई हराएको छ ।
आज आइतवार ललितपुरको च्यासल मैदानमा भएको खेलमा पुलिसले मच्छिन्द्रलाई २-१ गोलले हरायो । पुलिसका मोसेस ग्याबाह त्वामले २ गोल गरे । मच्छिन्द्रका आफिज ओलावालेले १ गोल गरे । यो जितसँगै पुलिस ३७ अङ्कसहित चौथौ स्थानमा पुगेको छ । मच्छिन्द्र ३९ अङ्कसहित दोस्रो स्थानमा छ ।
पुलिस क्लबको जितपछि शीर्ष स्थानको चर्च ब्वाइजलाई उपाधि जित्न सहज भएको छ । चर्च ब्वाइजले अब एक खेल जितेमा उपाधि जित्नेछ ।
आजै दशरथ रङ्गशालामा भएको खेलमा न्युरोड टिम (एनआरटी) र हिमालयन शेर्पा क्लबले १-१ गोलको बराबरी खेलेका छन् । हिमालयन शेर्पाका लागि दिवस उराउ र एनआरटीका लागि दिपेश आले मगरले १-१ गोल गरे । एनआरटी ३० अङ्कसहित दशौँ र हिमालयन शेर्पा ३१ अङ्कसहित सातौँ स्थानमा छ ।
यस्तै आजै एन्फा कम्प्लेक्सको मैदान सातदोबाटोमा भएको खेलमा सङ्कटा क्लबले एफसी खुमलटारलाई ३-० गोलले हरायो । सङ्कटाका लागि निशान खड्का, आयुष घलान र चन्दनकुमार दासले गोल गरे ।
पुछारमा रहेको खुमलटारलाई आजको हारपछि 'रेलिगेशन जोन' बाट माथि उठ्न निकै गाह्रो देखिएको छ । सङ्कटा ३० अङ्कसहित ११ औँ स्थानमा छ । खुमलटारको २४ अङ्क छ ।
