काठमाडौं, जेठ २८ । पशुपतिनाथ मन्दिर परिसरमा छाडिएका नन्दी (साँढे) तस्करी भएको छ । एक साताको अन्तरालमा दुई वटा नन्दी चोरी गर्दै गरेको अवस्थामा फेलापरेपछि पशुपतिनाथका साँढे पनि तस्करले लैजाने गरेको खुलेको हो ।
जेठ २३ गते साँढे चोरी गरी लैजान लागेको अवस्थामा रामेछाप घर भई हाल ललितपुरमा गाई फार्म सञ्चालन गर्ने यादव बोहोरालाई प्रहरीले पक्राउ गरेको हो । महानगरीय प्रहरी वृत्त गौशाललाका अनुसार सोही दिन अभियुक्त बोहोरालाई जिल्ला अदालत काठमाडौँबाट पाँच दिनका लागि म्याद थप गरी अनुसन्धान अघि बढाइएको छ ।
प्रहरीले बोहोरासँगै बा१३च १४०१ नम्बरको पिकअप भ्यान बरामद गरेको छ । साथै गाडीमा राखिएको एउटा नन्दी उद्धार गरिएको प्रहरीको भनाइ छ । पशुपति क्षेत्र विकास कोषका कार्यकारी निर्देशक डा घनश्याम खतिवडाले बौद्धबाट अर्को एउटा नन्दी पनि उद्धार गरिएको बताउनुभयो । उहाँका अनुसार शुक्रबार पशुपति क्षेत्रबाट बौद्ध पुर्याइएको नन्दी फिर्ता ल्याएर औषधोपचार गरिएको छ ।
उहाँले भन्नुभयो, ‘ठूला भएका नन्दी चोरी गर्ने गिरोह सक्रिय भएको पाइयो । यस्ता नन्दी पाँच मिनेटमा छोटो दूरी मात्रै हिँड्न सक्छन् । शुक्रबार बौद्धमा पुर्याएर बाँधेको अवस्थामा फेला पर्यो । हानेर भागेको भागै गर्यो । बल्लबल्ल उद्धार गरी ल्याएर औषधि लगाइयो ।’
डा. खतिवडाले पशुपतिनाम मन्दिरमा प्रत्येक पूर्णिमामा १२ वटा र मकैसुब्बा गुठीबाट एउटा गरी वर्षमा १३ वटाका दरले पशुपतिनाथका नाममा नन्दी छाड्ने परम्परा रहेको बताउनुभयो । उहाँका अनुसार यसरी छाडिएका नन्दी पाशुपत क्षेत्रमै रहन्छन् । उहाँले भन्नुभयो, कहिलेकाँही पशुपतिनाथबाट नन्दी हराउने कुरा सुनिन्थ्यो तर चोरी नै हुँदोरहेछ भन्ने अहिले खुल्यो ।
डा खतिवडाले नन्दी संरक्षणमा पशुपति गौशाला धर्मशालाको दायित्व हुने बताउनुभयो । उहाँले भन्नुभयो, ‘पशुपति गौशाला धर्मशालाको जिम्मेवारी नै पशुपतिनाथका नाममा छाडिएका नन्दी संरक्षण गर्नु हो तर गौशाला धर्मशालामा जर्सी गाई पालेर दूध व्यापार गरिन्छ । नन्दी बाहिरको बाहिरै हुन्छन् । त्यो जग्गा नन्दी संरक्षण गर्न हो गाई पाल्न होइन ।’ पशुपति गौशाला धर्मशाला अहिले मारबाडी सेवा समितिले सञ्चालन गर्दै आएको छ ।
