काठमाडौं, जेठ २९ । नेपाली राष्ट्रिय क्रिकेट टोलीका बलर सन्दीप लामिछानेको एकदिवसीय अन्तराष्ट्रिय (ओडिआई) तर्फको बलिङ वरीयतामा सुधार भएको छ ।
अन्तर्राष्ट्रिय क्रिकेट परिषद् (आईसीसी) ले सार्वजनिक गरेको नयाँ वरीयतामा सन्दीप १८ औं स्थानमा उक्लिएका छन्।
यसअघि सन्दीप १९ औं स्थानमा रहेका थिए । बलिङ तर्फ नै सोमपाल कामी १ स्थान तल झरेर ६७ औं स्थानमा आइपुगेका छन् । बलिङ तर्फ नै दीपेन्द्र सिंह ऐरी १ स्थान तल झरेर ५६ औं स्थानमा रहेका छन्।
अर्का तीव्र गति बलर करण केसी ९१ औं स्थानमा यथावत रहेका छन् । ब्याटिङ तर्फ भने नेपाली राष्ट्रिय क्रिकेट टोलीका कप्तान रोहित कुमार पौडेलले आफ्नो २ स्थान सुधार गरेका छन् । कप्तान रोहित नयाँ वरीगतामा ६६ औं स्थानमा रहेका छन् । ब्याटिङ तर्फ नै ओपनर ब्याटर आसिफ शेख २ स्थान माथि उक्लिदै ७३ औं स्थानमा कायमै रहेका छन् ।
नेपाल भने १४ औं स्थानमा कायमै रहेको छ । नेपाल भन्दा पछाडी नेदरल्यान्ड्स,ओमान,नामिबिया,अमेरिका,युएई र पपुवा न्युगिनी रहेका छन् । अष्ट्रेलिया वरीयताको शीर्ष स्थानमा रहँदा पाकिस्तान दोस्रो, भारत तेस्रो र न्युजिल्यान्ड चौथो स्थानमा छ ।
