हरारे, असार ३ । विश्वकप क्रिकेट छनोट खेलमा नेपाल जिम्बावेसँग पराजित भएको छ । आइतबार हरारेको मैदानमा भएको खेलमा जिम्बावेसँग नेपाल ८ विकेटले पराजित भएको हो ।
टस जितेर पहिले ब्याटिङ गरेको नेपालले जिम्बावेलाई जितका लागि २९१ रनको लक्ष्य दिएको थियो । हरारे स्पोर्टस क्लबको मैदानमा भएको खेलमा जिम्बावेले ४४.१ ओभरमा लक्ष्य पूरा गर्दै नेपालमाथि जित निकालेको हो ।
जिम्बावेको जितमा दुई ब्याटरले शतक प्रहार गरे। क्राग इर्भिन र सिन विलियम्सले शतक प्रहार गरे। एर्विनले १५ चौका र १ छक्का तथा विलियम्सले १३ चौका र १ छक्का प्रहार गरे ।
नेपालले निर्धारित ५० ओभरमा आठ विकेट गुमाउँदै २९० रनको योगफल बनायो । नेपालको लागि सोमपाल कामी र गुलशन झाले १/१ विकेट लिए । स्पिनर सन्दीप लामिछानेले सर्वाधिक ७७ रन खर्चिए । यस्तै, १० ओभर बलिङ गरेका दीपेन्द्रसिंह ऐरीले ५८ रन खर्चिए ।
समूह ए मा रहेको नेपालले मंगलबार दोस्रो खेल अमेरिकासँग खेल्दैछ।
