कोलोम्बो, काठमाडौं, साउन ३ । एसीसी इमर्जिङ टिम्स एसिया कपको आफ्नो अन्तिम खेलमा नेपालले आज युएई ‘ए’ सँग खेल्दैछ । नेपालले श्रीलंकाको पि सारा ओभल कोलोम्बोमा भएको टसमा हारेको छ । खेलमा युएई 'ए' का कप्तान अली नासिरले टस जितेर पहिला ब्याटिङ गर्ने निर्णय लिएको छ ।
नेपालले पाकिस्तानसँग १ सय ७९ र भारतसँग १ सय ६७ रनमा अल आउट भएको थियो । नेपाल भारतसँग सुरुवाती १० ओभरमा ३७-५ को अवस्थामा थियो भने पाकिस्तान विरुद्ध नेपाल सुरुवाती १० ओभरमा ४३-६ को अवस्थामा थियो ।
पाकिस्तान विरुद्ध सोमपाल कामीले ७५ र भारत विरुद्ध रोहित पौडेलले ६५ रन बनाएर नेपालको साख जोगाएका थिए ।तर, युएई विरुद्ध नेपालबाट उत्कृष्ट ब्याटिङको अपेक्षा गरेको थियो ।
युएईले दोस्रो र नयाँ रोजाईका खेलाडीहरु पठाएका छन् । नेपाल पहिलो खेलमा पाकिस्तान 'ए' सँग ४ विकेट र दोस्रो खेलमा भारत 'ए' सँग ९ विकेटले पराजित भएको थियो । युएई भारतसँग ८ र पाकिस्तानसँग १ सय ८४ रनले पराजित भएको थियो ।
युएई 'ए' लाई जितको कुनै दबाब नरहेको तर, खेलमा नेपाललाई दबाब हुने बताइएको छ । पछिल्लो समय सिनियर टोलीेले नेपालसँग लगातार हार्दै आएको थियो ।
