काठमाडौं, साउन ९ ।  काठमाडौंको सामाखुसी खोलामा आइतवार बेलुका आएको बाढीले बगाउँदा बेपत्ता भएका १३ वर्षका बालक साजन मगर अझै फेला परेका छैनन् ।

खोलाले बगाउँदा बेपत्ता भएका बालक मगरको खोजी कार्यका लागि नेपाल प्रहरी र सशस्त्र प्रहरी बलको विपद् व्यवस्थापनको टोली खटिएको र अहिलेसम्म पनि फेला पार्न नसकेको जिल्ला प्रहरी परिसर काठमाडौंका प्रमुख तथा प्रहरी वरिष्ठ उपरीक्षक दानबहादुर कार्कीले जानकारी दिनुभयो । 

काठमाडौंको पानीपोखरीको भानुभक्त मेमोरियल स्कुलमा कक्षा ६ मा अध्ययनरत बालक आइतवार बेलुका फुटसल खेल्न जाँदै गर्दा पर्खालबाट खसेर सामाखुसी खोलामा बगेर बेपत्ता भएका हुन् ।

हिजो बेलुका अबेरसम्म विपत् व्यवस्थापन महाशाखाका तालिम प्राप्त प्रहरी सहितको टोलीले खोजी गरेको थियो।एपिएफको टोली बाढीमा बेपत्ता बालकको खोजी गर्दै चोभार क्षेत्र हुँदै चाल्नाखेल पुगेको छ। बालक अझै भेटिएका छैनन्।