काठमाडौं, साउन ११ । भक्तपुरको सूर्यबिनायक नगरपालिका–८ स्थित सडकमा हाल नम्बर नखुलेको मोटरसाइकलले बा.९५ प ६४१३ नम्बरको स्कुटरलाई ठक्कर दिँदा स्कुटर अनियन्त्रित भई बा.४ ख ११७२ नम्बरको टिपरमा ठोक्किएर बुधबार राति दुर्घटना हुँदा स्कुटर चालक भक्तपुर नगरपालिका–२ इताछें बस्ने ३० वर्षीय सञ्जय पक्काको मृत्यु भएको छ ।
दुर्घटनामा गम्भीर घाइते भएका उनको मध्यपुर अस्पताल ठिमीमा उपचारको क्रममा मृत्यु भएको हो । टिपर चालकलाई नियन्त्रणमा लिएर हाल फरार मोटरसाइकल र चालकको प्रहरीले खोजी गरिरहेको छ । सवै दुर्घटनाका सम्बन्धमा प्रहरीले थप अनुसन्धान गरिरहेको छ ।
काभ्रेको नमोबुद्द नगरपालिका–२ सेल्फिडाँडास्थित सडकमा बा.५९ प २७३२ नम्बरको मोटरसाइकल अनियन्त्रित भई सडकबाट करिब ३० मिटर तल खसेर बुधबार साँझ दुर्घटना हुँदा चालक सोही नगरपालिका–५ बोहोरे बस्ने २७ वर्षीय सुमन कुमार श्रेष्ठको मृत्यु भएको छ । दुर्घटनामा गम्भीर घाइते भएका उनको धुलिखेल अस्पतालमा उपचारको क्रममा मृत्यु भएको हो ।
दाङको लमही नगरपालिका–१ नर्ति चोकस्थित सडकमा रा.४ प ५६०७ नम्बरको मोटरसाइकलको ठक्करबाट पैदलयात्री सोही ठाउँ बस्ने ४२ वर्षीय सन्तु चौधरीको बुधबार राति मृत्यु भएको छ । ठक्करबाट गम्भीर घाइते भएका उनको लमही अस्पताल लमहीमा उपचारको क्रममा मृत्यु भएको हो । हाल फरार मोटरसाइकल चालकको प्रहरीले खोजी गरिरहेको छ ।
