रोल्पा, साउन २३ ।  रोल्पामा बस दुर्घटना हुँदा चार जनाको मृत्यु भएको छ भने १४ जना गम्भीर घाइते भएका छन् ।

रोल्पाको बाघमारादेखि दाङको घोराहीतर्फ जाँदै गरेको ना ५ ख २६१२ नम्बरको बस रोल्पाको तिला बजार नजिकै मङ्गलवार दिउँसो दुर्घटना भएको हो । बस सडकबाट १०० मिटर तल खसेको थियो ।

दुर्घटनामा ज्यान गुमाउनेमा दुई जना पुरुष र दुई जना महिला रहेका प्रहरीले जानकारी दिएको छ । घाइतेहरूको उद्धार कार्य भइरहेको र मृतकहरूको सनाखत हुन बाँकी रहेको प्रहरीको भनाइ छ ।

घाइतेलाई प्रारम्भिक उपचारका लागि स्थानीय स्वास्थ्य चौकी र मेडिकलमा पठाइएको छ ।  थप उपचारका लागि दाङको घोराही वा जिल्ला अस्पतालमा पठाउने भन्नेबारे छलफल भइरहेको प्रहरीले बताएको छ  ।