कञ्चनपुर, भदौ ३ ।  कञ्चनपुरको भीमदत्त नगरमा एक शिक्षकले विद्यार्थीमाथि दुर्व्यवहार गरेको भन्दै विद्यार्थी आन्दोलित भएका छन्।

भीमदत्त नगरपालिका-१० जिमुवास्थित सिद्धनाथ माध्यमिक विद्यालयका शिक्षक वीरेन्द्र जोशीले छात्रा माथि दुर्व्यवहार गरेको भन्दै विद्यार्थी आन्दोलित भएका हुन्। आइतबार विद्यार्थीले शिक्षक माथि कारबाहीको माग अघि सारेर विद्यालयमा विरोध प्रदर्शन गरेका छन्। 

३१ साउनमा शिक्षक जोशीले एक छात्रा माथि दुर्व्यवहार गरेको भन्दै विद्यार्थीले विरोध प्रदर्शन गर्दै दोषीउपर कारबाहीको माग गरेका हुन्। विद्यार्थीले शिक्षक र कार्यकक्षमा ढुंगामुढा समेत प्रहार गरेका छन्। आन्दोलनका कारण आइतबारको पठन पाठन प्रभावित भएको छ। 

विद्यालय प्रशासनले भने शिक्षकले छात्रा माथि दुर्व्यवहार नगरेको दाबी गरेको छ। सिद्धनाथ माध्यमिक विद्यालयका प्रध्यानाध्यापक कृष्णसिंह बोहोराले ३१ साउनमा शिक्षक जोशीको छात्रासँग कुम मात्रै ठोक्किएको बताए। शिक्षक जोशीले पनि विद्यालयमा तल माथि गर्दा भिडभाडमा कुम मात्रै ठोक्किएको प्रतिक्रिया दिए। 

प्रहरीले शिक्षक जोशीलाई पक्राउ गरेको जिल्ला प्रहरी कार्यालय, कञ्चनपुरका प्रवक्ता प्रकाश डाँगीले जानकारी दिए। प्रहरीले घटनाबारे अनुसन्धान पनि थालेको छ।