बारा, भदौ ४ । २ बालबालिकालाई बोरामा राखेर भारत तर्फ लैजाँदै गरेका १ भारतीयले सशस्त्र प्रहरीले पक्राउ गरेको छ ।
बाराको सिमावर्ती गाउँपालिका देवतालबाट भारतको पूर्वीचम्पारण मूर्तिया ग्राम पञ्चायत वडा नं ४ आदापुरका २२ वर्षीय तबरेज आलमलाई नियन्त्रणमा लिइएको सशस्त्र प्रहरी बलका प्रहरी उपरीक्षक टोपबहादुर डाँगीले जानकारी दिए ।
उनले देवताल गाउँपालिका-३ अमवा गाउँका शिवपुजन महतोकी ९ महिनाकी छोरी र प्रेमचन्द्र महतोका २ वर्षीय छोरा बोरामा राखेर भारत लैजादै गर्दा फेला पारिएको सशस्त्र प्रहरी उपरीक्षक डाँगीले जानकारी दिए ।
बच्चालाई आइतबार उद्धार गरी नेपाल प्रहरीलाई जिम्मा लगाइएको उनले बताए । आलम माथि थप अनुसन्धान भइरहेको प्रहरी उपरीक्षक डाँगीले बताए ।
उनका अनुसार बोरामा राखी भारत तर्फ लैजाने क्रममा बच्चाहरु रोएको आवाज सुनेपछि उद्धार गरिएको हो । उद्धार गरिएका बालबालिकालाई आइतबार नै अभिभावकको जिम्मा लगाइएको छ ।
