काठमाडौं, भदौ ११ । सेलेब्रेटीहरु विभिन्न क्षेत्रसँग जोडिएर अगाडी बढिरहेका हुन्छन् । चलचित्र र अन्य मनोरञ्जनका विभिन्न पाटासँग जोडिएका सेलेब्रेटीहरु पर्दामा मात्र देखिदैनन् सामाजिक कार्यसँग राष्ट्र र राष्ट्रियताका विषयमा पनि लागि नै रहेका हुन्छन् । यहि सन्दर्भलाई प्रस्तुत गर्दै नेपाली सेलेब्रेटीहरुले हिमालमा अर्थात हाई अल्टिच्युड ग्राउण्डमा फुटबलको मैत्रीपूर्ण खेल खेल्ने भएका छन् ।
बाईकस नेपाल र एन्ट फाउण्डेशनले सेलेब्रेटीहरुलाई मनाङको हाई अल्टिच्युडमा लगेर मैत्रीपूर्ण खेल खेलाउन लागेको हो । सिनेमा टुरिजम, हिमाली छायांकन स्थलको प्रचार, वातावरण पर्यावरण, क्लाइमेट चेन्जका पक्षलाई सकारात्मक रुपमा प्रचार गर्दै हिमाली जनावरहरूको संरक्षण तथा कन्जरभेशनका लागि भन्दै मैत्रीपूर्ण फुटबल खेल आयोजना हुन लागेको हो । राजधानीमा एक कार्यक्रमको आयोजना गर्दै एन्ट फाउण्डेशनले सो कार्यक्रमको बारेमा जानकारी दिएको हो ।
स्थानीय जनताले हाल सम्म मनाङमा गरेको प्रकृति संरक्षकलाई सम्मान गर्दै स्थानीय युवाहरूलाई हिउँ चितुवा लगायतका वन्यजन्तुहरुको संरक्षणमा लागिरहन अभिप्रेरित गर्ने, मानव र वन्यजन्तु बिच सह अस्तित्व कायम गर्ने, जलवायु परिवर्तनले हिमाली क्षेत्रमा पारिरहेको असरको बारेमा सूचित गर्ने र पर्यापर्यटन प्रवर्द्धनमा प्रोत्साहन गर्ने उद्देश्यहरूको साथ यही भाद्र २५ देखि २७ गतेसम्म मनाङ जिल्लाको तिमाङ, पिसाङ र मुजीमा अवस्थित फुटबल मैदानहरूमा सेलिब्रेटी टिमले अरु खेलाडीहरूसँग मैत्रीपूर्ण खेल आयोजना हुन लागेको हो ।
“कलाकार देशका गहना हुन्, यसो मतलब राष्ट्र र राष्ट्रियताका लागि हामी पनि आफ्नो भूमिकाबाट चुक्नु हुदैन । हामीले मैत्रीपूर्ण खेलमा सहभागी हुँदा जनावरहरुको संरक्षण हुन्छ र वातावरण पर्यावरणबारे सूचना प्रवाह हुन्छ भने नि नगर्ने ? यसले राष्ट्रियतासँग प्रभाव पार्छनी । यसले त सिनेमा टुरिजम पनि बढ्छ ।” अभिनेता तथा एन्ट फाउण्डेशनका अध्यक्ष प्रशान्त ताम्राकारले भने ।
तीन दिनसम्म हुने खेलमा चार समूहबीच मैत्रीपूर्ण खेल हुनेछ । सेलेब्रटीहरु राष्ट्रिय स्तरका ख्याति प्राप्त कलाकार, विभिन्न सौन्दर्य प्रतियोगिताका विजेताहरू रहनेछ । जुन समूहलाई हिमालयन स्नो लेपर्ड नाम दिइएको छ । यस्तै स्थानीय खेलाडीहरुको ३ वटा समूहलाई कान्जिसरा याक, पिसाङ याक र मनाङ याक नाम दिइएको छ । उक्त समूहहरुमा स्थानीय खेलाडीसँगै क्षेत्रीय र राष्ट्रिय खेलाडीहरू समेत सहभागी हुनेछ ।
हिमालयन स्नो लेपर्ड समूह अर्थात सेलेब्रेटीहरुमा अभिनेता प्रशान्त ताम्राकार, आँचल शर्मा, त्रिचु राई, नरेन खड्का, आर्यन अधिकारी, जेम्स प्रधान, प्रशिक्षक हरि खड्का, खेलाडी अनिल गुरुङ, निरु थापा, अस्मिता रान्पाल, सिता तामाङ, उपेन्द्रमान सिंह, मिस नेपाल वर्ल्ड सूचा प्रधान, मिस्टर नेपाल समर्पण कार्की, मिस युनिभर्स नेपाल सोफिया भुजेललगायत रहनेछन् ।
सांस्कृतिक कार्यक्रमको प्रदर्शन, हिमाल पारीको जिल्ला मनाङ सम्मको रमणिय यात्रा र बिभिन्न उचाइमा रहेका फुटबलका खेल मैदानहरुको भ्रमण, चलचित्र छायाँकंन गर्न उपयुक्त ठाउँहरूको अवलोकन, हिउँ चितुवा वासस्थानको भ्रमण विदेशी विज्ञ डा. जेफ मन्टी फेरिङ सँग यात्रा र अन्तक्रिया कार्यक्रमका थप आकर्षणहरू हुने आयोजकले जनाएको छ ।
