काठमाडौं, भदौ २९ । एसिया कपको सुपर फोर खेलमा घरेलु टोली श्रीलंकाले पाकिस्तानमाथि दुई विकेटको रोमान्चक जितका साथ फाइनलमा प्रवेश गरेको छ । बिहीबार राति भएको सुपर–४ खेलमा श्रीलंकाले पाकिस्तानलाई २ विकेटले पराजित गरेको हो ।

श्रीलंकालाई अन्तिम २ बलमा ६ रन आवश्यक थियो । अर्को बलमा चारिथ असालान्काले चौका र अन्तिम बलमा २ रन लिएर टोलीलाई रोमाञ्चक जित दिलाए । श्रीलंका ११ औं पटक एकदिवसीय एसिया कपको फाइनलमा पुगेको छ । श्रीलंकाले उपाधिका लागि आइतबार कोलम्बोमा भारतको सामना गर्नेछ ।

कोलम्बोको आर प्रेमदासा रंगशालामा टस जितेर ब्याटिङ गरेको पाकिस्तानले ४२ ओभरमा ७ विकेट गुमाएर २ सय ५२ रन बनाएको थियो । डीएलएस पद्धति अन्तर्गत श्रीलंकाले २५२ रनको लक्ष्य मात्र पाएको थियो । श्रीलंकाले ४२ ओभरमा ८ विकेट गुमाएर जित निकालेको हो ।

सुपर फोरको अन्तिम खेल  भारतले शुक्रबार बंगलादेशसँग खेल्नेछ । उपाधिको लागि आइतबार श्रीलंकाले भारतसँग खेल्नेछ । श्रीलंका साविक विजेता टोली समेत हो ।