पेरिस, असोज १८ । विश्वका सबै मुलुकहरु जस्तै फ्रान्स सामु पनि चुनौतीहरूका पहाड छन् । सन् २०२४ मा फ्रान्सले ओलम्पिक खेलको आयोजना गर्दैछ । तर, आफ्नो इज्जत र प्रतिष्ठा बढाउने र वैभव देखाउने ओलम्पिक खेललाई स्मरणीय र भव्य बनाउनका लागि जुन ऊर्जा उसले खर्च गर्नुपर्ने हो त्यो बैठक र योजनामै खर्च भैरहेको छ, त्यो पनि निकै अनौठो विषयमा ।
सुन्दैमा अनौठो लाग्नसक्छ, फ्रान्सको पछिल्लो टाउको दुखाइको विषय कुनै शत्रु मुलुक होइन वा बिग्रँदो आर्थिक अवस्था तथा जलवायु परिवर्तन पनि हैन । फ्रान्सको चिन्ताको कारण उडुसको आतंक हो । उडुसले यदि प्रतियोगितामा आउने अन्य देशका खेलाडिहरु माथि धावा बोल्यो भने के अवस्था होला ? भन्ने चिन्ताले फ्रान्सलाई सताएको छ ।
उडुसको समस्यासँग जुधिरहेको फ्रान्सले ओलम्पिक खेल शुरु हुनुअघि यो किरासँग जुनसुकै हालतमा छुटकारा पाउनुपर्ने हुन्छ । रिपोर्ट अनुसार उडुस आतंकबाट राजधानी पेरिस सबैभन्दा धेरै प्रभावित छ । वास्तवमा पछिल्लो केही वर्षयता उडुस फ्रान्सको राष्ट्रिय समस्या नै बनिरहेको छ । चाहे घर होस् वा अस्पताल अनि सिनेमाघर होस् वा रेल, सबै ठाउँमा उडुसको आतंक छ ।
अस्पताल तथा सिनेमाघरहरुमा समेत उडुसले टोकेको भन्दै धेरै मानिसहरुले सोसल मिडियामा पोस्ट गरिरहेका छन् । हालै त्यहाँको युजीसी सिनेमाघरले आफ्ना एक ग्राहकलाई उडुसले टोकेको विषयमा माफी माग्दै फिल्म हलमा उडुस निवारण गर्नका लागि तत्कालै आकस्मिक उपाय अपनाइने जनाएको छ ।
फ्रान्सका परिवहन मन्त्री क्लेमेन्ट ब्यूनले माइक्रो ब्लगिङ साइट एक्समा उडुस आतंकका बारेमा लेख्दै उडुस आतंक समाधानका लागि परिवहन सञ्चालकहरु समेत जागरुक हुनुपर्ने बताएका छन् । यस अघि पेरिसका उपमेयर इम्यानुयल ग्रेगोइरले फ्रान्सको राष्ट्रिय सार्वजनिक स्वास्थ्य समस्या बनिसकेको उडुस संकट माथि तत्कालै कारबाही अगाडि बढाउन फ्रान्सका प्रधानमन्त्री समक्ष अनुरोध गरेका थिए ।
राजधानी पेरिसमा उडुसको समस्या कति उच्च छ भन्ने कुरा पछिल्लो बीमा नीतिबाट पनि थाहा पाउन सकिन्छ । पेरिसमा अब उडुसका कारण उत्पन्न हुने स्वास्थ्य समस्याको उपचार खर्चलाई स्वास्थ्य बीमाले व्यहोर्ने व्यवस्था गरिंदैछ । फ्रान्सको उर्जा मन्त्रालयले भने अन्तराष्ट्रिय यात्रा तथा किटनाशक औषधि प्रतिको बढ्दो प्रतिरोधी क्षमताका कारण उडुसको संख्या बढिरहेको जनाएको छ ।
